نفسي اعيش

امبارح ... قابلت بنوته جميله اوى
رقيقه خالص وشكلها اصغر من سنها الى عرفته بعد شويه .... قبلتها بالصدفة البحته فى المواصلات وانا مروحه بعد يوم طويل جدا جدا جدا بالنسبالى


قعدت جنبي ومتكلمناش خالص... بعد شويه صحبتى كلمتنى تطمن عليا وطبعا بما اننا يوم الحد وفاضل 3 ايام على 25 يناير منستش اسألها هنتقابل امتى بالظبط

بقولها هتنزلى يوم 25 امتى ... ولما سألتنى نازله قلتلها طبعا ... واتفقنا ممكن نتقابل امتى و....
خلصت المكالمه وسلمت على صحبتى

البنوته بدون اى سابق انذار :

انتى نازله يوم الاربع؟؟؟ رايحه التحرير؟؟

انا : اه ان شاء الله طبعا 

البنوته " الى بالمناسبه مش فاكره اسمها مع انى فاكره شكلها الجميل كويس" : 

انتى مش خايفه ؟؟

.... انا خايفه اوى من يوم 25 ...... انا خايفه عليكي بلاش تنزلى .... انتى مش خايفه؟؟

انا : لا مش خايفه .... الميدان مبيخوفش

البنوته : انا من مصابي 25 

انا : بجد؟؟ الف سلامه عليكي 

البنوته : انتى مش خايفه يجرالك حاجه

انا : لا مش خايفه ولو موتى هيغير البلد انا مستعده اموت بس المهم ماموتش ببلاش وفى الاخر البلد متتغيرش

البنوته : انا مش موافقه على النزول يوم 25 وخايفه من الى هيحصل وحاسه ان نزولنا ملوش لازمه

انا : على فكره انا مهندسه... وكملت شويه كلام عن النزول

البنوته : انتى ليه قولتيلى انك مهندسه ... على فكره انا كمان مهندسة

انا : عشان بس كل الناس بتكلم عننا على اننا بلطجيه ومخربين .. اومغيبين فكريا ... او ماشين ورا مش عارفه مين الى بيحركنا

البنوته : لا والله .... انا عارفه انكو كويسين بس انا خايفه عليكو

انا : انتى عارفه احنا نازلين ليه ؟؟

البنوته : لا

انا : احنا نازلين لمطلب واحد بس تسليم السلطه لمجلس الشعب المنتخب الى" انتخبناه " عشان يعمل انتخابات رئاسيه عشان كفايه كل الى حصل ده

البنوته : طب ما هو هيسلمها بعد 6 شهور .... انا مش مستحمله ناس تموت تانى او يجرالها حاجه كفايه كده بقى انا خايفه عليكو وخايفه عليكي اوى ... استنو شويه ونسيب الدنيا تهدى

انا : على فكره انا اول واحده فى مصر محتاجه استقرار واول واحده تتمنى البلد تستقر النهارده مش بكره
لان الثوره قعدتنى فى البيت وقفلت المكتب الى كنت شغاله فيه ونتيجه ده انا وقفت الماستر بتاعى يعنى كل احلامى وقفت فأجه لحد ما البلد تستقر فلو حد عاوز استقرار يبقى انا ... بس عمرنا ما هنستقر كده غير لما الثوره تخلص....

انا : انتى عارفه دى للمره الكام يطلوبوا مهله 6 شهور لتسليم السلطه.... دى تالت مره يطلبوها مره يوم 13 فبراير بعد تنحي مبارك وقالو ست شهور ولما خلصوا الست شهور قالو معلش البلد مكنتش مستقره كمان ست شهور وهنسلم  البلد ولما الست شهور التانين قربوا يخلصوا بداو انتخابات البرلمان وقالو لسه كمان ست شهور ولو سكتنا عمر نهايه الست شهور ما هتجي
البنوته بصتلى وابتسمت وسكتت شويه كتير .... وبعدين قالتلى عندك حق
واتكلمت معاها شويه فى سياسه المجلس وان البلد متغيرتس فى "تأييد تام من البنت" ...

وبعد شوية

البنوته : انا اتصبت يوم 25 ...ومن ساعتها وانا بخاف من كل حاجه ...... الامن المركزي ضربنى وقعدت فى المستشفى كتير وعظمه مناخيرى اتكسرت بس الحمد لله خفيت .... من ساعتها وانا خايفه اوى وخايفه عليكو اوى

انا اصلا مليش فى السياسه ومليش دعوه بحاجه .... انا كان عندي شغل يوم 25 الى فات ونزلت عشان شغلى بس حسيت انى عاوزه اروح اشوف الناس بتعمل ايه نفسي انزل ابص واشوف ايه الى بيحصل..... انا مع الثوره بس كنت خايفه ومش حاسه ان في حاجه هتحصل

نزلت الشارع اشوف الامن هجم علينا وانا اتمسكت واتضربت لحد ما اتبهدلت واتصبت

انا: على فكره انا مش شجاعه اوى يعنى زي منتى فاهمه ..... انا خايفه موت ونفسي اعيش 

نفسي اخلص الماجيستير بتاعى ... 
عندى احلام كتير اوى فى حياتى نفسها اعيشها

نفسي الثوره تخلص والبلد تستقر وارجع شغلى

نفسي اشتغل فى مجالات كتير واعمل حاجات كتير اوى

نفسي البلد تبقى مستقره وتتطور واحس انى فى بلد بتحترم الناس 

انا مش عايزه اموت ونفسي ممتش دلوقتى ...... خايفه اوى على اهلى لو جرالى حاجه ... انا بنتهم الكبيره 

ونفسي افرحهم بيا وبنجاحى ف حياتى 

بس كل ده مش هيحصل غير لو البلد اتغيرت واستقرت والثوره تخلص 

لو متنا هو التمن فى ان البلد تتغير انا معنديش مانع اموت بس حاجه تحصل بدل الى احنا فيه

البنوته : يا حبيبتى انا خايفه عليكي خلى بالك من نفسك  

         انتى قايله لأهلك انك نازله؟

انا: لا مش قايليلهم هما عارفين انى عندى كورس يويميها ..... اهلى خايفين عليا ومش موافقين انى انزل التحرير ولا وفقوا قبل كده بس انا بنزل .....بشوف اى حجه وانزل ....... ومعرفه اصحابي عشان لو جرالى حاجه لا قدر الله يقولولهم 

بعد كده اتكلمنا فى حاجات كتير عن البلد ومجال شغلنا لانه بالمصادفه هيا فى نفس مجالى ..... وعنها وعن اصابتها ولما جت نازله سلمت عليا وقلتلى ربنا معاكى خدى باك من نفسك وحافظي عليها .. 

حقيقى لما روحت البيت وافتكرت الى حصل استغربت انى قلت الكلام ده ومعرفش انا جبته منين.......
حقيقي انا فى الميدان مش ببقى خايفه بحس بأمان يمكن عشان حواليا ناس نقيه خرجت كل حاجه وحشه فى قلبها بره قبل ما تدخل لانهم مش ضامنين يخرجوا منه تانى
ويمكن عشان بحس انى وسط ناس خايفه عليا اوى رغم ان دى اول مره تشوفنى فيها وميعرفونيش
ويمكن عشان ربنا بيقوينى وبيثبتنا واحنا هناك
معرفش ليه ببقى مش خايفه 

بس مش زي ما انتو فاهمين ...... بخاف لما العسكر يهجموا وبجرى
انا جبانه وبقف جوه الميدان بعيد عن الضرب لانى خايفه اموت وخايفه اكتر لأتصاب


كل مره بنزل فيها بحلم انى ارجع تانى البيت وانام على سريرى واتخانق مع اخواتى واعمل كل الحاجات الى بعملها حلوه ووحشه وببقى مشتاقه للبيت

كل مره قبل ما انزل اخاف اوى لاحسن اتصاب .... الموت عندى اهون


كل ما اتخيل لو كنت مكان حراره كان ممكن يجرالى ايه اكيد كنت هموت ومش هستحمل لانى مش قويه


كل مره بنزل فيها بدعى انى اروح سلميه عشان اعيش احلامى 


مره زمان اتسألت نفسك تموتى وانتى عندك كام سنه قلت وانا عندى 50 او 60 كفايه اوى
النهارده وانا بكتب النوت دى حاسه انهم قليلين جدا ونفسي اعيش سنين كتير اد احلامي لنفسي ومستقبلي 


ورغم خوفى الكبير الى زاد ..... ورغم انى حاسه انى هموت ....... ورغم الصدف الغريبه الى بتحصل ادامى اليومين دول بتخوفنى اكتر وتحسسنى انى قربت اموت
منهم ان وحده من اصحابي بدون مناسبة بعتتلى رساله توصينى فيها بتجديد نيه الشهاده قبل منزل يوم الاربع مع انها مش عارفه انا نازله ولا لا
وواحده تانى بعتت بردو حاجه بنفس المعنى تقريبا ..... وناس كتير بتكلم على الى ممكن يحصل يوميها ( مع انى حاسه انه مش هيحصل حاجه يوميها او على الاقل الصبح )


بس بردو هنزل ان شاء الله وعندى امل انى ارجع تانى واعيش واحقق احلامى
هنزل وعندى امل فى بكره احلى من النهارده ومن امبارح
هنزل وعندى امل ان مصر تتغير واعيش فيها الى حلمت بيه


هنزل وكلى امال واحلام كتير وكبيره اكيد زي كل احلام الى نزلو من سنه وملحقوش يحققوها عشان دفعولنا حياتهم .... واكيد زي احلام الناس الكتير الى مش هتنزل 


انزلوا معانا عشان احساسنا بالامان يزيد وانتو جمبنا ... وعشان قوتنا فينا احنا وسلالحنا فى وحدتنا


انا مكتبتش النوت دى والله عشان اقول لحد ينزل بس كنت حاسه بيها اوى ونفسي الناس تحس بيا وتفهم احنا نازلين ليه


انا نازله وعندى امل ارجع تانى ونحتفل سوا كلنا السنه الجايه بالذكرى الاولى لنجاح الثوره وببلد جديده اسمها مصر مختلفه عن مصر بتاعت زمان :)
يارب حققلى حلمى


افتكرت اسم البنت ......... زينب

أنزل

معرفش ليه حاسه كده بحاجات غريبه جدا


احاسيس ملغبطه اوى 
خوف وفرحه واشتياق...
خايفه ومستنيه بشوق وفرحانه بس قلبي مكسور
خايفه اوى من 25 بس مستنياه اوى وحساه اتاخر اوى ونفسي يجي بقى
وحشنى اوى الميدان وهو مليان والناس بتهتف يسقط يسقط حكم العسكر
ولما يجي اسم مصر الارض تتهز تحت رجلينا واحنا بنحتف تحيا مصر
وفرحانه اوى انه قرب وفاضل 5 ايام عليه
بس خايفه ومش مطمنه مش مستحمله ناس تانى تصاب وتموت وعنيها تروح .......... مش حاسه بدعم الناس زي زمان ........ خايفه اموت واهلى قلبهم يتكسر عشانى وفى الاخر اتخون واطلع كنت مخربه ومضحوك عليا


قلبي مكسور مش عارفه ليه............ يمكن عشان لسه كل ما اشوف صوره شهيد او اسمع اغنيه يابلادى يابلادى .... انا بحبك يابلادى اعيط اوى وقلبي يوجعنى.....


يمكن حاسه بكده عشان بقالنا سنه ولسه دموع اهالى الشهدا فى عيونهم منشفتش؟؟؟


يمكن عشان لما بروح ازور المصابين او اهاليهم قلبي يتقطع وهما فى المستشفي محدش حاسس بيهم


يمكن عشان لقيت اخت مصاب بقاله 3 شهور فى غيبوبه فى العنايه المركزه مش بيعرفوا يشفوه ... مامته نفسها بس تسمع صوته مره ......... وحالته حرجه ومحتاج عمليه ومحدش ولا بيعبروه ولا بيعبر اهله فى المستشفي ... وسيبينه كده
ولما كلمت اخته كانت بتضحك وتبتسم كانها بقالها 3 شهور مش عارفه تستوعب اخوها جراله ايه؟؟؟


وانا بكلمها حسيت انها بتكرهنى وبتكرهنا كلنا عشان مش بنساعدهم هم واخوها؟؟
ومع ذلك هيا مبتسمه علطول ........... ولما بنسالها طب هو عامل ايه دلوقتى ...بتضحك وتقولنا تعبان ومحتاج عمليه


يمكن عشان بقالنا سنه كامله ولسه بنتشتم نفس الشتايم ولسه ناس بتقولنا كفايه خربتوا البلد؟؟


يمكن عشان كلمت ابو مصاب وحسيت انه من كتر ما انكسر وقلبه اتجرح على ابنه الى مرمي ادامه بيتألم ليل نهار بقى بيخاف من كل حاجه وكل حد وقعد يتحايل عليا منزلش تانى الميدان؟؟


يمكن عشان صحبتى مصابه وبابها بيضغط عليها وزعلان منها عشان نزلت الميدان ومحلفها ما تقول لحد انها اتصابت فى التحرير لانه خايف لحسن يعملوا فيها حاجه.......... ورغم كده هيا عاوزه تنزل تانى يوم 25
ولسه بيتقال علينا بلطجيه وعاوزين نخربها


يمكن عشان ناس بتطلع تقولنا العكسر هيمشوا بس عاوزين خروج امن؟؟؟


بعد كل الناس الحلوه الكتيييييييييير دول الى ماتت خروج امن .......... بعد كل لحظه خوف فى الميدان كنت فيها بفكر ماما هتعمل ايه لما تعرف انى مت فى الميدان وانى كنت بكدب عليها واخبي عليها انى نازله ........خروج امن ؟؟؟


بعد كل لحظه شفت فيها ادامى مصاب بيقع وبيتنقل المستشفي بس من كتر ما شفتهم ادامى بقيت حاسه انه عادى يعنى .......... خروج امن ؟؟؟


بعد ما حراره ومالك وعبد الفتاح عنيهم راحت ............ خروج امن ؟؟؟


بعد كل لحظه سمعت فيها ناس بتشتمنا بودانى وخفت ارد عليهم ليعرفوا انى من  بتوع التحرير ويضربونى او يموتونى .... خروج امن؟؟؟


بعد ست البنات ما اتعرت فى الشارع وبعدين طلع رجال دين يقولوا عليها تستاهل ايه الى وداها وهيا اصلا مش منقبه ........... خروج امن؟؟


على فكره انا مش واحده جامده وكنت فى الميدان ليل نهار ........ ولا حضرت يوم معركه الجمل ولا اضربت ولا اتصابت ...... بس حقيقي حقيقي كنت اتمنى ابقى نص اى حد من الابطال الرجاله ( ولاد وبنات ) الى كانو فى الميدان على طول




انا زعلانه منكو عشان بتقولوا العسكر يخرجوا خروج امن
زعلانه من الاخوان عشان مش عاوزين يستلموا السلطه ويعملوا انتخابات وباعونا للعسكر

زعلانه من القاضي الى بيحاكم مبارك عشان بيضحك علينا

وزعلانه اوى من الناس الى بتقولنا كفايه بقى ومش عاوزنا ننزل يوم 25

 وزعلانه اوى من بابا وماما عشان مش عاوزني انزل يوم 25 عشان خايفين عليا


هنزل يوم 25 واصحابي هينزلوا وكل الشباب الحلوين هينزلوا يوم 25 ........... هنشيل العسكر وهنحاكم المشير وهنبنى بلدنا ونخليها احلى بلد فى الدنيا وهنحتفل فى الميدان بمصر حررررررررررره والعكسر بررررررره
هنزل وههتف عيش حريه عداله اجتماعيه
هنزل عشان اجيب حق الشهيد ... والمصاب
هنزل عشان ميبقاش فى بلدنا شاحتين فى الشارع ولا اطفال بتنام تحت الكوبرى فى عز البرد
هنزل عشان منبقاش زى الخرفان والكبار بيسرقونا وياكلو خيرالبلد ويأكلونا اكل مسرطن
هنزل عشان يبقى فيه عدل والى يغلط يتحاكم
هنزل عشان صوتى يوصل ومطالبي تتحققهنزل عشان يبقى فيه شغل كتير وميبقاش فيه شباب على القهوه
هنزل عشان يبقى فيه شقق ومستوي معيشه يسمح للشباب بالزواج فميبقاش في تحرش فى الشوارع
هنزل عشان يبقى عندنا جامعات وتعليم .... عشان يبقى عندنا مخترعين ونصدر للبلاد التانيه
هنزل عشان يبقى فيه اكل وكل الناس تاكل وتعيش مبسوطه ومحدش ينام جعانهنزل عشان مش عاوزه حد يقول تانى همشي جوه الحيط او جنب الحيط وخلينا فى حالنا
انا هنزل اجيب حقي وحق مصر.............وانت قرارك ايه؟؟

من غير عنوان

اول مره اكتب وانا فى الحاله دى........... اول مره اكتب وانا حاسه بالاحساس ده


طول الوقت كنت دايما بتكلم عن المصابين والشهدا وقلبي يتقطع وممكن اعيط ويصعبوا عليا ... بس عمرى ما تخيلت ايه احساس اهلهم واصحابهم؟؟
عمرى مهما وصلت بأفكارى معرفت احساسهم غير دلوقتى


ربنا ميوريه لحد ..... عمرى ما عرفت احساسهم مهما قولت انى قلبى موجوع عليهم وانى حاسه بيهم قبل كده ... ومهما اى حد فيكو قال انه حاسس بيهم وانه حاسس انه موجوع عشانهم بردو هو مش فاهم ولا متاكد ولا حاسس بيهم اصلا ولا حاسس زيهم


اصل انا دلوقتى حسيت بيهم


طبعا محدش فتهم حاجه


النهارده عرفت ان واحده من اجدع واطيب وابسط الناس الى عرفتها مصابه من ايام محمد محمود ......... واصابتها خطيره وفالعين كمان


النهارده بس عرفت ايه احساسك لما يبقى حد من اطيب البنى ادمين الى على وجهه الارض حد طيب وبرئ وقلبه ابيض بجد ولما بيحب حد بيحبه بس من قلبه بدون اى اسباب
ويتصاب وممكن _لا قدر الله _عينه تروح بس عشان بتحب مصر اوى وكان نفسها البلد تبقى احسن


بس عشان صعب عليها تشوف اخواتها المصرين بيضربوا وببيتهانوا وعنيهم وقولوبهم بتروح كل يوم


عارفه انه كلام ممكن يكون رخم والناس عارفه ومش عاوزين يقروه بس انا قلبي واجعنى اوى ومش مصدقة


طبعا انتو مش فاهمين حاجه ...... بشويش هفهمكم


صحبتى دى بنوته عسوله وبريئة طييييييييييييييبه جدا بجد مهما قلت مش هتعرفوا هيا اد ايه حد قلبه ابيض غير لو شوفتها بتحب الناس كده عشان هيا طيبه مش عشان هما كويسين او بيعملوها حلو او وحش


ساره بنت عادية اوى ملهاش فى السياسه ولا عمرها اتكلمت عن مبارك او الشرطه ولا حتى كنت فاكرها متابعه الى بيحصل فى البلد من كتر ما هيا طيبه وفى حالها بتحب مصر اه بس هيا زى ما مصرين كتير بيححبوا مصر بدون ما يدخلو نفسهم فى مشاكل


اول مره اعرف ان ساره ليها فى السياسيه ..... اول مره اعرف ان ساره بتحب مصر اوى اوى كده واكتر منى كمان عشان انا عامله فيها شجاعه وبفهم فى السياسه وبنزل وانا عارفه الوضوع عامل ازاى انما هيا نزلت عشان صعب عليها المصرين وحسيت انها لازم تنزل تقول لمصر انها بتحبها ............. كان يوم من ايام محمد محمود بجد كانت اكبر مفاجاه ليا انى اشوف ساره البنوته الطيبه فى الميدان نازله عشان خايفه على مصر وعلينا


فرحت اوى اوى لما شفتها .......... بس كل ما افتكر انى قلتلها اول ما شفتها ساره انتى اخر حد توقعت اشوفه هنا ازعل من نفسي اوى لان هيا اتصابت وانا لا ............ ساره انتى اجدع بنت فى مصر انا بحبك اوى


ساره اتصابت اصابه غريبه عشان نعرف اننا كنا بنتعامل مع يهود مش مصرين ........... اصابه ساره كانت فى عينها وكانت من الغاز المثير للأعصاب الى اتحدف علينا .............. ساره مرحتش ولا مره محمد محمود لانها خافت يجرلها حاجه وباباها وماماتها يعرفوا انها كانت بتنزل التحرير ..... ساره قعدت طول الوقت جوه الميدان عند الصنيه دى اكتر حاجه تقدمتها




ايه اصابتها بقى بالظبط .......... الغاز المثير للأعصاب دخل عنيها وتفاعل جوه العين وعمل اجسام صلبه......... لا دى مش حكايه من حكايات نبيل فاروق فى سلسله ملف المستقبل دا حقيقه


وللأسف الحاله اتخرت لانها خافت تعترف انها كانت فى الميدان ولما عنيها تعبت اوى وورمت راحت لداكتره وادوها ادويه والادويه زودت الحاله سوء لحد ما اعترفت لدكتوره صاحبه ماميتها وعامله ليها فحصوات واشعه كتير لحد ما وصلوا الى ان الغاز كون الاجسام الصلبه دى وحاليا هيا عملت عمليه وابتدت تشوف تشاش بعينها ولسه هتعمل عمليات تانى ....


على فكره ساره مش قايله لحد عن الحاله بتاعتها وعشان كده لسه عارفه ولسه كاتبه عنها النهارده


غير ان اهلها وبالذات باباها حذروها ان حد يعرف لانهم كانو اصلا مش موافقين على نزولها وهيا نزلت من وراهم وهيا طلبت من الاتنين الى عرفوا الحاله ان محدش فيهم يقول اى حاجه لاى حد بس انا كان لازم اكتب


عشان كل الى بيشتمونا ويخنونا يعرفوا ان فيه ناس زي الورد عنيهم راحت واتصابوا ..... وانتو قاعدين فى البيت تشتموا عليهم


عشان ابناء مبارك وابناء المشير يعرفوا ان الى اتعمل فى المصرين دا ولا جرايم الحرب


عشان تعرفوا ان الناس الى نزلت الميدان مش بس لا تسعي للشهره كمان دول بيعانو فى صمت من غير ما حد يحس بيهم ولا يعرفهم


بيدفعوا ليكو تمن الحريه ويمضوا فاعل خير من غير ما حد فيكو يعرفهم ومش مستنين منكم شكر ......... ورغم كل ده كمان بتشتموهم


قلبي وجعنى اوى بجد .............. واول مره احس انى بكره ابناء مبارك ومؤيدي المجلس كده بكرهكو كلكو ويارب ساره تخف وانتو يجارلكو كده عشاان تحسوا بيا وبساره


ادعو معايا ساره تبقى كويسه عشان هيا طيبه ومتستاهلش حاجه وحشه


بس خلاص خلصت