يسقط يسقط حكم العسكر

النهارده التدوينه قد تكون بلا معنى بس لازم اكتبها لانها اخر تدوينه فى اول سنوات التدوين ليا ومش اخرها ان شاء الله


كمان ساعتين و40 دقيقة هتنزل كلمه " The End " على السنه الى عامله زى افلام هليود دى


مش عارفه المفروض افرح ولا ازعل


2011 سنه حلوه ولا وحشه


انا فى 2011 فقدت كتير اوى من الناس الى بحبها وقريبين اوى لقلبي 
فقدت شغلى 
مصر فقدت مايزيد عن الف او يمكن الفين من انبل من انجبت هذه الارض
الجيش قطع صورته الحلوه فى نظرنا 
المجلس دهاسنا بالمدرعات
فات سنه ...12 شهر كامين على الثوره كلهم قتل ودم ومصابين عيون راحت عشان نشوف النور 
ناس كتير اوى حلوين اوى واحلى مننا بكتير وقلبوهم نضيفه اوى دفعوا قلوبهم عشان احنا نعيش بنى ادمين محترمين وفى الاخر .....سبناهم يضربوا لوحدهم وقعدنا احنا نشتم فيهم فى البيت 

بنات اتضربت واتشدت فى الشارع من شعرها واتقلعت الحجاب واتعرت واحنا قلنا عليهم بنات مش متربيه ايه الى يينزلهم الشارع لوحدهم


كتير اوى... وحش اوى .......ناس كتير ماتت مهمين ...وناس كتير اتصابت وعينيهم راحت .....ناس كتير اتيتمت او ولادهم ماتو


بس 2011 كانت اعظم سنه على مصر مرت من يوم ما اتعمل حاجه اسمها تاريخ

مش عشان فى ثوره ابتدت فيها وهتكمل ان شاء الله فى 2012 
ولا عشان حسنى مبارك لاول مره من يوم ما اتولدت مش هينكد علينا بصوت امه الوحش ف اول يوم فى السنه
ولا عشان محدش هيطلع يقول المسلمين مبيحبوش المسيحين وبيتخانقوا ليله راس السنا
ولا عشان مبارك وجمال وعلاء لاول مره مش هنشوفهم فى كل حته لمده اسبوع
ولا عشان حمله جمال مبارك لتولى الرياسه خلصت الحمد لله
ولا عشان شفيق اتخلع ورا مبارك

ولا عشان انا خلصت التمهيدي ونجحت فى التويفل وجبت سكور عالى
ولا عشان اتطوعت تطوع حقيقي فى انوار رساله اهم حاجه فى حياتى 

ولا عشان اتكرمت من رساله مرتين ودخلت لاول مره فى حياتى سحب على العمره لانى كنت اعلى متطوعه نشاطا فى رساله

ولا عشان عشان اتعرفت على ناس جامده اوى فى التحرير

ولا عشان شميت غاز مسيل للدموع وغاز مثير للاعصاب ووقفت جنب اجدع واحلى واحسن ناس فى التحرير ( طبعا دى من اسعد لحظات حياتى)

ولا عشان صديقتى الصدوقه اتخطبت ربنا يسعدها 




عشان حاجه واحده بس لاول مره فى التاريخ المصرين بطلوا خوف
نزلو الشوارع يقول لا بأعلى صوتهم 
لاول مره نتوحد على هدف واحد مصر جديده نظيفه ومتطوره ( زى المدارس كده)

عشان شوفت ناس بتحب بعض بجد وهيا اول مره تشوف بعض

عشان شوفت ناس بيتحدف عليها طوب وبتتضرب بالنار ولما يشربوا عصير او يستخدموا منديل يشلوه فى ايدهم لاول باسكت 

عشان شوفت ناس املها فى بكره
شفت اطفال بتغنى بلادى يبلادى لكى حبى وفؤادى الى عمرنا ما رحنا المدرسه بدرى ووقفنا فى الطابور مخصوص عشان منغنيهاش

عشان فى اطفال اتربت على ريحه الغاز المسيل للدموع
عشان فى اطفال اول ما اتعلموا يتكلموا قال يسقط يسقط حسنى مبارك

عشان المصرين قامو من نوم عميق بقاله سنين لدرجه ان الكل قال عليهم ماتو


مكنش نفسي البوست يبقى سياسي فى اخر لحظات سنه 2011 

كنت فكاراه هيطلع شخصي واحلامى وطومحاتى والحاجات الحلوه دى الى كل الناس بيقولها 
بس لقيت هو ده احلامى وطومحاتى هو ده بجد الى حاسه بيه


رغم كل شئ بحب 2011 وفرحانه اوى اوى انها خلصت عشان جالنا امل جديد 25 جديد فيه حلمنا


ومع اخر لحظات 2011  وبدايه 2012 هتمنى امانى كتير مش امنيه واحده


امنيتى بلدنا تبقى احلى بلد فى الدنيا .... اجيب حق الشهدا وزى النهارده السنه الجايه نقف نحتفل فى التحرير رافعين راسنا عشان مرتاحين واحنا حققنا للشهدا حلمهم الى ماتوا عشانه

حلمى بكره ميبقاش فيه عسكر واشوف كل الى قتل ضحكه مصر فى السجن
حلمى اخلص الماجيستير واشتغل فى شركه كبيره
حلمى اخس 20 كيلو :)

حلمى يوم 25 الجاى نحتفل فى التحرير بالذكرى لاول لاعظم ثوارت العالم 
حلمى بـ بكره احلى لينا ...بتاعنا احنا بس ...احنا الى نرسمه ونلونه 


حلمى اعيش فى بلد يحلم اى حد فى العالم يجي بس يشوفها
حلمى اعيش سعيده ومصر راضيه عليا


كل سنه ومصر طيبه وجميله 


كل سنه واحنا مبسوطين ومرتاحين واحرار نملك قرارنا حتى لو كان غلط
كل سنه واحنا طيبين




Happy New Egypt ...... Isa




واخر كلمه هقولها فى نهايه السنه واستقبال السنه الجديده


يسقط يسقط حكم العكسر
  
ثوار ....احرار .... هنكمل المشوار
  
الثوار راجعين .......يوم خمسه وعشرين
  
اشوفكوا فى التحرير .... عام جديد سعيد ..وثوره من جديد 

هو فيه ايه؟؟؟

بيجلي احساس عجيب غريب كده كل ما اروح مظاهره ولا امشي فى مسيرة او ازور ميدان التحرير واخرج منه تانى

بيجلى احساس ان فيه حاجه غلط

مهو يالى فى التحرير مش من هنا ياما احنا الى مش من هناك


حد فاهم حاجه؟؟؟ .... لا طبعا ولا انا بردو

نبدأ من الاول

طبعا كلكو عارفين مصر ... ايوه صح مصر دى الى احنا عايشين فيها ....مصر الى فيها شوارع زحمه اوى وناس مش طايقه بعض وبيشتموا فى بعض وفى البلد وفى الظروف...هيا صح الى كل يوم بتضطر تدفع رشوه فيها عشان ورقك يمشي وعشان ضميرك ميوجعكش بتقول عليها اكراميه

هيا مصر الى بتروح فيها الشغل تمضي حضور وترّوح او تعد على القهوه لحد معاد الانصراف دا اذا كان عندك شغل اصلا تمضى فيه حضور

هيا مصر الى لو قلت لولد فيها اتقى الله فى البنات وبطل تعاكسهم وعاملهم زي اخواتك يتنفخ اوى ويقولك لاااااااااااااااا انا اختى محترمه...او انا مش هعاكس البنات الى محترمه انما الى بتلبس مش عارف ايه بقى تستاهل
او نعمل ايه ما احنا مش عارفين نتجوز


حاولت اسال كتير على عنوان التحرير ... ودايما الاجابه بتيجلي كده وسط المدينه ..القاهره ..مصر

بس فى التحرير لما نزلت فى مليونيه من المليونيات ( مش فاكره انهى اصلهم بقوا بعدد اسابيع السنه )
كان فيه ولد لما تهت من اصحابي مش ورايا عشان محدش يضايقنى ووصلنى لصحبتى ولم كنا بنجي فى حته زحمه كان بيطلع ادامى يوسعلى الطريق ويعدينى انا الاول وبعدين يمشي ورايا تانى عشان محدش يزقنى وعاملنى كانى اخته

بردو فى التحرير لما تعبت شويه من الغاز المثير للأعصاب جاتلى بنت بسررعه وقفت جنبى واديتنى مناديل ولما فوقت قالتلى روحى انتى شكلك تعبان ولما بصيت فى وشها لقيتها واخده رصاصه تحت عنيها ومكمله وواقفه

في التحرير سمعت حد بيقول لواحد بيوزع اكل لا انا كلت دور على حد لسه مكلش


فى التحرير شاب لما اخد فلوس من دكتور عشان هو اتبرع بيها لشراء  مايه للناس راح لقى فيه مايه كتير رجعله يستأذن يبدل المايه بعصير

فى
 مظاهره فى الشارع كانو بيقولوا امشوا على الرصيييييييييف الطريق هيقف


ولما نتشتم نقول شكرا

فى مظاهره شوفت ولاد بيحوطوا البنات عشان ميجرلهمش حاجه

كل  مره بنزل التحرير او اى مسيرة بشوف ناس محترمه مؤدبه مبترميش زباله فى الارض بتنضف الشارع بتحب بعض بتخاف على بعض بتؤثر على نفسها .... بتحترم المرور بتقسم اللقمه مفيش ولد بيبص لبنت بنبقى واقفين جنب بعض مفيش حد يضايق التانى


بخرج من التحرير اعدى بس الشارع اسمع خلق الله بيشتموا فبعض اشوف واحد بيكسر بعربيته على التانى عشان يتخانق معاه وميت واحد بيكسر الاشاره وناس بترمي زباله من شباك العربيه وكله بيلحق ياخد اى حاله قبل ما الى جنبه يلحقها وكله بيدعى على كله وراشوى بتتدفع فى الشارع وناس بتنصب على ناس

حد يقول ازاى ممكن مجموعه من البشر تقدر تعيش حاجه من اليوتوبيا الكامله فى مكان ما وكل ما حوليها عكسهم تماما .... ازاى ممكن مجموعه من البشر يبقوا انقياء اوى كده فى الميدان بس لما بيخرجوا منه ممكن يرجعوا عادين تانى؟؟؟

بحاول افهم مش عارفه

عذرا ............. لسنا خرافا

هل تعرفون الفرق بين الحرية وتحسين أوضاع المعيشة؟؟...


كنت أعتقد أن النزعة الإنسانية وحدها كفيلة بحمل أهلها من البشر بمعرفة الفرق والاعتقاد فيه والإيمان به ..... ولكنني فوجئت بأن ذلك غير كافي ... حيث قابلت من البشر الكثير ممن لا يفهمون ولا يقدرون قيمة الحرية ... قيمة أن تكون أنت صاحب قرارك .. قيمة أن تشعر بأنه من حقك الاختيار والمناقشة والمعارضة أو حتى التفكير باستخدام عقلك فقط وحدك دون سائر العقول في الحكم على الأمور ..

حقيقةَ لم أكن أفهم كيف يمكن لمن يمتلك عقلًا وقلبًا ألا يعرف قيمة الحرية، وأن يخلط بين رفاهية العيش، وقيمة الحرية.

ولكن ذات يوم بينما أناقش أمور شتى أنا وبعض زملائي فوجئت بزميل ـ يفترض أنه على قدر من العلم والثقافة ـ عندما دخل النقاش في أمور السياسة وما يدور في مصر والدول العربية من حولها يسألنا سؤال ـ أثار داخلي التساؤل الدهشة ـ لماذا يثور أهل الخليج ؟؟؟؟
ماذا ينقصهم ليثوروا ويتمردوا ؟؟؟؟

وأنا هنا لست بصدد مناقشة الموقف سياسيًا ـ وحينما أجبت وأجاب آخرين؛ حتى يشعروا بأنهم أسياد قراراتهم، وليسوا قصّرًا، ومن حق من هم أعلى شأنًا، أو فوقهم طبقات أن يختاروا ما يناسب الأقل شأنًا ـ الشعب ـ ومن يحكمهم ومن يقرر لهم وبأى الطرق يدير الحكم .. بل ويختاروا أيضًا طريقة العيش المناسبة لقاصري التفكير؛ لأنهم لا يعرفون "الصح" ليختاروه .... وفقط هم ( الشعب ) يعيشون في تلك الرفاهية يأكلون ما يقدم لهم ويعيشون في المستوى الذي حدده لهم الأعلى شأنًا ....

"وكأنني قد اشتريت حوضًا من سمك الزينة فاخترت له شكل الحوض، ونوع الطعام، ومكان وضعه داخل الشقة، وعلى السمك أن يأكل، ويعيش سعيدًا بما قد اخترته له، بل وقد أنقم عليه إذا ما قدمت له نوع الطعام الخاطئ، ورفض أكله، فأتركه يموت جوعًا عقابًا على تمرده على نوع الطعام الفاخر ـ من وجهه نظري على الأقل ـ الذي قد اشتريته له".

فرد الزميل : وماذا ينقصهم للثورة ؟؟؟ يملكون المال، والعيش المرفه، وحالة اقتصادية جيدة حتى أنهم لا يحتاجون للعمل من أجل المال، أو حتى ليعيشوا في مستوى أفضل وكثير منهم كذلك ... !!!!!!!!
وحين سألته إذن: لماذا بوجهة نظرك قام المصريون بثورة ؟؟؟
ردّ وبتلقائية شديدة: ظروف المعيشة السيئة والصعبة.


في الحقيقة آلامني بشدة ما سمعت، هل حقًا ما قام به المصريون ثورة جياع كما قال البعض ؟؟؟
هل قاموا بثورة من أجل لقمة عيش نظيفة ... ومرتب يكفي لحياة كريمة فقط ؟؟؟
هل ثاروا ليحصلوا على شقة للزواج ؟؟؟..... حتى وإن عاشوا خرافًا !!!!!!!!!!!
حتى وإن عاشوا كقطيع يقودهم راعي الأغنام ؟؟؟؟
هل حقًا أصبحت الحياة تتمحور أمام أعين المصريين في مقومات الحياة لأي كائن حي حتى هذه الكائنات التي بلا عقل ؟؟؟
هل هو فقط طعام، وشراب، ومأوى؟؟

إذن لماذا لم يوافق جموع المصرين بوعود الرئيس السابق لهم بعد أن وعد بتحسين الأوضاع ؟؟؟
هل كانت أزمة ثقة ؟؟؟ فلطالما وعدونا بعيشٍ كريم ولم يفوا أبدًا بتلك الوعود الكاذبة ؟؟؟


وحينها فقط أدركت لماذا طالب الكثير - ومازالوا للأسف - أن نكف عن ذاك الهراء كلما وعدنا أيًا من أصحاب ذات الوجوه التي لا تتغير وإن تغيرت الأسماء بتحسين الأوضاع ؟؟؟
لماذا دائمًا هناك من ينادينا أن نكف أيادينا عما نقوم به من تخريب للوطن، وتفكيك لمؤسساته، وإسقاط لرموزه المزعومة؛ التي لطالما حملت الوطن إلى المهانة وسط أوطان الأخرين ؟؟

........... فقط لأنهم لا يعرفون معنى للحرية.....

هم حقًا يطالبون "كما قال دكتور مصطفى محمود" بتحسين أوضاع العبودية لا أن ينالوا حرية
بل ـ وللأسف الشديد ـ يرون التمرد على أكبال العبودية التي فٌطرنا على رفضها .. فطرة الخالق العلي العظيم .... خروجًا عن الحدود المسموحة .. خروجًا عن حدود الأدب واللياقة .... خروجًا على احترام الكبير، والرموز


ولكنني بعد جولة من الإحباط كادت أن تعصف بي، وتضمني إلى ذلك القطيع أو تاخذني بعيدًا عن هذا وذاك .... تذكرت..
تذكرت جيدًا إحدى رفيقات التحرير ... إحدى الفتيات الرائعات اللائي غيرن في نظر العالم معنى أن تكون مصريًا، مع أقرانهن من الشباب
اللذين أعطوا للعالم درسًا رائعًا في معنى المساواة


تذكرتها وهي في ميدان الأحرار حينما سألتها مراسلة لأحدى المجلات الأجنبيه لماذا أنتي هنا في الميدان؟ لماذا تهتفين وبما تحلمين؟ ...فردت وبلغة أجنبيه جيدة أنا هنا حتى يحيا أهلي من أبناء الوطن حياة كريمة يستحقونها .... أنا هنا حتى يكون هناك في ربوع وطني مساواة ..... أنا هنا لأقضي على الفساد الذي ملئ أرجاء الوطن .... أنا هنا لأن من حق الجميع أن يعيش حياة تصان فيها كرامته، بغض النظر عن قدرته المالية .... وذكرت للمراسلة أنها تعمل في مكان ومجال قد يحلم الكثير به ... وأن راتبها يحلم الكثير أن يتقاضوا نصفه ... ولكنها خرجت للمطالبة بحياة الأحرار لكل أهل هذا الوطن.


تذكرت شاب مصري يعيش ملكًا في أحدى دول الخليج يترك مملكته ويأتي إلى هذا الوطن ليطالب لأهله بحرية وعدل ومساواة .... يضحي بسعادته وربما حياته أيضًا من أجل أن يحيا الغير في رغد العيش ... لا يرضى أن يحيا وأن يعيش أهل جلدته كالخراف في وطنهم يسجنهم فيه راعي، ربما أقل شأنًا وقيمة من الخراف نفسها ... ولكنه لسوء الظروف يملك زمام أمرهم

تذكرت هؤلاء الشباب الرائع الذي خرج للميادين بصدورٍ عارية ليواجه الموت فقط ليعيش أقرانهم كالبشر وليس كأي نوع آخر من المخلوقات

حينها أدركت ... أنه ربما هناك من تجرد من صفات الإنسانية ... فلم يعد يعرف للعدالة، والمساواة، والحرية قيمةً أو معنى ....
ولكن هناك من لم يفقد إنسانيته حتى وإن لم ينال من التعليم والثقافة ما يسمح له بالمعرفة ... ولكنها فطرة الإنسان السليمة التي مازال هناك الكثير يحتفظ بها رغم كل شيء ورغم أي شيء


ومازال هناك من يهتف بأنه لا يقبل أن يحيا مكبل اليدين عبدًا وإن قُدمت له الكنوز ليعيش ذليلًا


هناك من يهتف عذرًا لسنا خرافًا ... نحن آل البشر كرمنا وحررنا الله، لا يملك أمرنا أيًا من يكون سواه

الطرف التالت

اتفهم تماما وبكل عقلانيه تفسير الدكتور الرائع والداعيه المحترم فاضل سليمان وكثيرين بالطبع -ولكنه اشهرهم- للمشهد الدرامي شديد الدمويه الذي نمر به
واعى تماما ما يقولون بل وادعى اننى على اتم اقتناع به  واتفق معهمبل وافسر ايضا المشهد -تقريبا- بنفس التفسير


* هناك من لا يريد لنا ان نصل لمرحله رئيس دوله ودستور ومجلس منتخب يعبر عن ارادته الشعب *


 ايوه صح وصح جدا كمان
فى "طرف" يطلع بقى تالت او رابع مش مهم المهم انه يسعى جاهدا الا نصل لمرحله النهايه لهذه المرحله الحرجه المليئه بالتخبطات والمليئه بالبلطجه والقتل والدم الذى يجرىي انهارا فى ميادين مصر
هناك من يسعى جاهدا لان "يبقى الحال على ما هو عليه"


ووراء ذاك اللهو الخفى يقف وبلا ادنى شك فى ذلك المجلس العسكري لسبب واحد من اثنين (فى وجهه نظرى على الاقل)


 الاول
* اما إنه هو نفسه المستفيد الاول وليس الوحيد مما يددور الان على ساحه المشهد
- فهو لا يريد تسليم السلطه للشعب وبالتالى يقع ويخض للمسائله والمحاسبة والتانيب وربما العقاب ايضا على ما اقترفه ومازال يقترفه وما ينوى على اقترافه فى حق الجيش اولا ثم مصر كلها ثانيا
- وربما لان بعض اعضاؤه قد اصابهم جنون السلطه فهم لا يريدون الا فقط ذلك المنصب الغالى بما فيه من منافع معنويه وماديه ربما لم ولن يجدوها فى اى منصب اخر 
- وربما لانه يخاف ان يفشي اسراره وفضائحه بعضا ممن يحاكمون سوريا منذ مايزيد عن 9 اشهر دون صدور حكم ودن ان نعرف ان كانوا حقا فى زنازين خمسه نجوم او انهم فى خارجها اصلا


اما الثانى
* فهو ان يكون هناك من يتلاعب بقياده الجيش ... ووقع هذا اكبر واعظم من السبب الاول ... فأذا كان مجلس قياده خط الدفاع الاول لمصر يتلاعب به بعضا من قله او كثره ممن يريدون سوءا لهذا الوطن  ولا يريدون الا ان يأكلو اكبر قدر ممكن من لحم هذا الوطن 
اذا كان خط الدفاع الاول لمصر لا يقدر على فهم خطه خبيثه واضحه وعبيطه من بعض اعدائنا حتى وان كانو يشبهوننا ملامحا ولغتا وشكلا 
اذا كانو لا يقدرو على التخطيط للقضاء على عدو بلا سلاح ....فكيف يكون الحال اذا ما كان هناك  "اخر"  بسلاح قرر خوض التجربه ضدنا بعد ان رأي غيره يبلي بلاءا حسنا "لا بقدراته  او دهائه" ... بل بغباء الخصم؟؟




وهناك من يرجح سبب ثالث هو ان المجلس من السذاجه حيث يعتقد ان فى ذلك صالح مصر
او انه يخشي علينا من حكم الاسلاميين اللذي سيودي بنا الى التهلكه... فيري ان يحاربهم حتى وان دفع الثمن ابناء الوطن ...ليبقي الوطن خاويا بلا مخاوف ولا من نخاف عليهم 


او انهم ببساطه عسكريون ولا يفهمون فى امور السياسيه التى تحتاج لمحنكين يجيدون اللعب بها او يملكون من المكر والدهاء ما يؤهلهم لفهم ما يجرى على الساحه وفى الكواليس ويقرؤن ما بين السطور وما ورائها



وايا كان السبب وابا كان مدى اقتناعى او اقتناعك به ... وايا كان صدقه ومصداقيته فى قرائه الامر 

نحن اما قضيه واضحه وهيا انهار من دماء المخلصين من ابناء هذا الوطن
نحن امام زهره شباب انبل من انجبت هذه البلد يذهب بلا ثمن فى ميادين الحريه فى مصر ... يطلبون الحريه لاهلها من بعدهم
نحن امام حرب ضاريه تدور رحاها فى شوارع مصر بين مصر ومصر والجميع من خارج الحلبه يشاهد وينتظر النهايه ليجدد حساباته


اذا كان ايا من تلك الاسباب يحمل -من يقومون على حمايه البلد واداره شئونها فى هذا الوقت العصيب- على سلب ابناء الوطن   --من اوكلوهم هذه المهمه فى الاصل-- روحهم وحياتهم وعيونهم وربما انتماء من لم يموت منهم


هل نظن بعد كل ذلك مهما اوتينا من ذكاء او حتى سلب منا .... ان القصه ستنتنهي بمجرد انتهاء انتخابات المجلس الشريعي؟؟؟؟
هل ما سيجبر المجلس العسكري على التخلي بمنتهى السهوله وبدون مقاومه بعد كل هذه الاخطاء والدماء مجرد انتهاء  الانتخابات؟؟؟


هل نظن ان مجلس الشعب القادم المنتخب قادر بكل بساطه على حمل المجلس العسكري على التسليم ورفع الرايه لهم والعوده بدون ضمانات لثكناتهم؟؟؟




هل قاموا بكل ما قامو به وقتلوا من قتلو وسفكو الدماء حتى لا يكون هناك مجلس منتخب ثم ينتظروا انتهاء الانتخاببات ليسلموا لنا بمجرد انعقاده؟؟؟

ام ان البعض يعتقد انه بأمكانه ان يعقد صفقات ناجحه للتسليم ؟؟؟

اين عقولنا عندما نعتقد ان كل الامور ستسير بمنتهى السلاسه والسلامه بمجرد انتهاء الانتخابات؟؟؟؟

ام اننا نتوقف بالتفكير حتى ذلك الوقت ولا نستطيع االتفكير فما ياتى من بعده؟؟؟




الواقع ينبأ بأنه لن يكون هناك مجلس وان تكون المجلس لن يكون له القدره على انتزاع الحكم ممن يحتمون به 


ولا سبيل لذلك الا الشاارع فلا تلوموا على من يحاولون ان يختصروا الطريق ويصلوا بنا لبر الامان من اقصر الطرق واوضحها وأامنها ان يحاولوا بطريقتهم كما تحاولون عبثا بطريقة اخرى لا ارى لها جدوى




لن يسلم المجلس ...... واذا اراد ان يبرأ نفسه فليأتى لنا بذاك الطرف الثالث 
وحينها قد نمحوا عنه تهمه التورط معه ولكن لن نمحي دماء ابنائنا من الطرقات ....لن نمحي عنه عاما كاملا من البحث فى بلد يملك فيها كل المؤسسات والقدرات للوصل بسهوله لذلك الطرف الخفى ومع ذلك ترك الوطن يسقط في الجحيم


لن نمحوا له كذبه وافترائه علينا وعلى انبل من وجدوا فى مصر 


لن نمحو له انه ضللنا بسلاح اعلامي فاسد حاول غسيل مخ بل سلب عقل ولب كل ذي لب من اهل هذا الوطن


لن نمحوا ولن نسامح اى طرف اشترك ولو بالسكوت على دم اهل هذا الوطن حينما كان قادرا على البوح بالمتورطين ومنعه الخوف على مصالحه

وارجو الا يساء الفهم او يُقول الحديث بما ليس فيه

الصورة مش مقلوبه

سمعت مره زمان .... مش زمان اوى يعنى اول الثوره كده
مهو اول الثوره ده زمان ... اه والله مش مصدقنى؟؟؟
احسب معايا الثوره قامت يوم 25 يناير هتقولى ايه يعنى مش من زمان اوى من 12 شهر بس
هقولك لو كل الازمان بتتحسب بالشهوريبقى الثوره كانت 18 يوم
لكن الازمان بتتحسب بالاحداث الى بتم خلالها ..... من 12 شهر مات كام واحد واتصاب كام واحد واتفضت كام مظاهره واتكدب واتكفر واتخون كام واحد واتقبض واتحاكم على كام واحد
لو حسبت كل ده هتعرف ان اول الثوره دى من زمااااااااااااان

ارجع تانى بقى للصوره ..... سمعت مره نواره نجم بتتكلم على الصوره
كانت بتكلم ان المشكله لما الصوره تتقلب ومتتعدلش ان الناس بتتعود عليها مقلوبه لو جيت تعدلهلهم بيتخانقوا معاك ويقلولك بتقلبها ليه
لانهم من كتر ما تعودوا عليها مقلوبه .....  ومن كتر ما شفوها مقلوبه ومقدروش يعدلوها من الخوف
اقتنعوا او صدقوا انا كده عدلتها
وطبعا الاجيال الى اتولدت لقت اصلا الصوره مقلوبه اصعب فى اقناعها من الاجيال الى شافو الصوره وهيا بتتقلب

وسمعت بردو الداعيه الفاضل عمر خالد وهو بيقول مره ان كل الصور ليها وجهين
وان السبعه والتمانيه هما شكل واحد بيتقري حسب موقفك منه لو انت واقف فوق يبقى 8  ولو واقف تحت بقى سبعه ( ملخص الفديو الى عمله يعنى )

واقتنعت بيهم جدا وحاولت استوعب اختلاف الرأى وان كل الصور تحمل كذا وجه حتى حب البلد ليه ميت وجه ومش محتاج شرح

واى صوره فى الدنيا مهما كانت ثابته كل واحد بيشوفها من وجهه نظره


لكن فى حاجات مبادئ يعنى مثلا الاحمر مفيهوش وجهات نظر مينفعش حد يكون شاف اللون احمر اخضر مثلا يبقى اعمي ولامؤاخذه
ومحدش بيشوف الاسود ابيض!!!1
.
.
.
يعنى لما تبقى وحده ست عندها فوق الخمسين سنه وشعرها ابيض ويجيها عسسكري من شعرها ويوقعها فى الارض ويضربها ويتلم عليها عساكر وهيا ست وعجوزه ولوحدها ومعهاش الى تدافع بيه عن نفسها
وتعلق دكتوره بتحضر زماله على المشهد ان الست العجوزه اكيد هيا الى بدات تضرب ....يبقى الصوره مش مقلوبه

لما يقتل ويستشهد عالم ازهرى جليل فى اعتصام الوزاره ... ويطلع شويه ناس معرفش جمجمتهم محشيه اييه ويقولوا دا اعتصام عيال صيع بيحششوا وعشان كده كسروا الكاميرات وحاولوا اقتحام الوزاره فالجيش رد.... يبقى الصوره مش مقلوبه

لما يسالنى حد وايه الى ينزل بنت  المظارهات وهو مجعوص اوى وبيتفرج عليها بتتسحل وتضرب وتتشتم بافظع الفاظ وحنجرته ما ساعتدهوش على انه يقول اكتر من ايه الى نزلها ..... يبقى الصوره مش مقلوبه

لما واحده امبارح تقولى انا معاكى الجيش طبعا غلطان وانتو على حق بس انتو لما كسرتوا الشرطه اديكى شايفه البلد بقت حالتها ازى ... مش ممكن تكسروا الجيش كمان حتى لو غلطان لازم يفضل اقوى وميتكسرش ..... يبقى الصوره مش مقلوبه

ولما واحد امبارح يقولى لما شيرت ايفينت المسيره النسائيه للبنات ....بس البسوا كويس عشان محدش يتلكك كأن الضرب والسحل حلال ومش مشكله وكل الغلطه الى غلطها العسكرى انه عراها ...... يبقى الصوره مش مقلوبه

لما يبقى الناس شايفه ان يحكمنى اى حد ان شاله حتى جلادى بس يبقى فيه استقرار ..... يبقى الصوره مش مقلوبه


ولما واحد بيشوف عسكري بيقلع بنت فى الشارع غصب عنها ويقول اصلها مكنتش لابسه حاجه تحت العبايه
طب مهو قلعها العيبايه نفسها فرقت ايه بقى

يبقى الصوره مش مقلوبه ................. الصوره اتقطعت


ولا يسعنى ان اختم هذا المقال الا بقول "ابن سينا " رحمه الله على العالم الجليل
المستعد لشئ تكفيه اضعف اسبابه

وللدكتور العلامه " مصطفى محمود "
هناك من يناضلون من اجل التحرر من العبوديه
وهناك من يطالبون بتحسين اوضاع العبودية


واخيرا رحمه بنا يرحمكم الله

يوم فى الانتخابات

النهارده الاثنين 5/12/2011  الاعاده فى المرحله الاولى فى دايره م نصر زى ما انتو عارفين

نزلت متاخر على المغرب كده عشان اروح ادلى بصوتى فى الاعاده
المدرسه بعيد عن بتنا شويتين ومرميه فى الصحراء الجرداء مابين التبه والتامن حته كده صحرا وعمارات لسه جديده وبتتبنى بس انتو عارفينى مبحفش بقى وعامله انى شخصيه مستقله :)

ماعلينا المهم نزلت عشان انتخب وصلت بالسلامه كانت لسه الدنيا نور عادى لان المغرب كان لسه بيدن
دخلت وانتخبت وخرجت مشيت حسيت انى نسيت طريق الرجوع وخفت لتوه فى الصحرا دى ببص ادامى لقيت بنوته كانت لسه معايا فى اللجنه شفتها وانا داخله اللجنه ومعاها شاب كده قلت شكلهم عارفين الطريق همشي وراهم
مشيت وراهم فالولد شافنى فبيقولى بتدورى على الانتخابات قلتلو لا انا انتخبت بس عاوزه اطلع على الطريق تانى قالى طيب تعالى ورانا
ومشيت معاهم وشكرتهم

البنت ببراءه : انتخبتى مين
انا: مصطفى النجار .... بصتلى وتنحت
ولقيت الشاب بيبصلي شذرااااااااا وبعدين سألنى: الكرسي؟؟ هو رمز الكرسي صح؟
انا: اه هو
الشاب بصلي
وراح سالنى: ودا اخوان ولا سلف ( وكأن الدنيا خلت من كل القوى ومفضلش غيرهم )
وعنده حق اصل انا كنت لابسه عبايه فأكيد يا اخوان يا سلف
رديت عليه  وانا مبتسمه ولا دا ولا دا دا حزب العدل مؤسس حزب العدل
قالى العدل اه وبصلى تانى بقرف كده اكتر وجاينى من فوق لتحت وكان ناقص يقولى اه يا زنديقه وماشيه ورانا

.........وطبيعي انا عرفت هما انتخبوا مين بس من باب رد السؤال يعنى قلت مكسفهمش واسأل

وانتى انتخبتى مين
ردت البنت بسرعه" بسم الله ما شاء الله " : التمساح والحقيبه
راح الشاب بسرعه معدلها والشبكه
التمساح والشبكه

اخوان وسلف مع بعض كده

ابتسمت  ..... راح قايلى بصي هتمشي يمين فى شمال هتخرجي تلاقي الطريق
وفى وسط الصحرا والفضا ده راح قال للبنت اسيتنى يا ...._ مش فاكره اسمها_ وطلع المحفظه

طبعا بدون احراج اكتر من كده فهمت ان الشاب مستكبر يمشي مع زنديقه منتخبتش الاخوان زي فاخت بعضي وشكرتهم ومشيت
لوحدى بعد ما تخلو عنى :( وسابونى اكمل لوحدى فى الفضا ده ومديت عنهم




ملحوظه  عشان الناس الاذكيه

الناس الى هتسأل مش هو صحرا يمين ايه وشمال ايه الى هتمشيه فى الصحرا
الطريق الى كنا فيه فيه عماير لسه بتتبنى يعنى فيه شمال ويمين :)

كل ما يتعلق بانتخابات نقابه المهندسين

انتخابات نقابة المهندسييييييييييييييييييييييييييييييييييييين


السلام عليكم يا بشمهندسييييييييييييين يارب تكون كلكو كويسين

النوت دى هحاول اختصر فيها معضلة انتخابات النقابه الى اصعب من الثانويه العامه

معلش هيا طويله شويه بس عشان انا بحاول اشرح فيها ( على اد فهمى يعنى) كل ما هو متعلق بأنتخابات النقابة من اول هنعمل ايه فى اللجنه لحد اشهر المجموعات الى مرشحين نفسهم فى انتخابات النقابه ..... اتمنى تقروها للأخر والى عنده اي معلوومه جديده او شايف حاجه انا كتباها مش مظبوطه ياريت يبعتلى عشان اظبطها .... وربنا يوفقنا لاختيار الانسب لنقابتنا ومننساش ان اهميه انتخابات النقابه من اهميه انتخابات مجلس الشعب لان ده الى هيوفق اوضاع المهندسين فى البلد بشكل يخليهم ينتجوا احسن

الحقيقه انا بكتب النوت دى بعد اقتراح زميل وصديق ليا انى اكتبها وطبعا حسيت انها مهمه نظرا لما عانيته عشان افهم ايه المطلوب مننا وهمنخب ازاى لحد ما كنت ابتديت اشك فى مستوى ذكائي وقعدت اذاكر اذاكر لحد مافهمت هننتخب ازاى
الحق ادخل فى الموضوع قبل ما انسي الى ذاكرته وارجع مش فاهمه تانى

• اولا: الانتخاب نفسه:

هننتخب ازاى؟؟؟؟؟؟؟؟؟؟؟؟؟؟؟؟؟

ودا اصعب سؤال على كل الناس لان معظم الشرح والكلام لعمليه الانتخاب كان فعلا غامض معادا قليل جدا


كل مهندس او مهندسه هيتخب فى 5 ورقات ( مجموعه من الاوراق هننتخب فيهم ناس على مستوى الجمهوريه كلها ومجموعه لمجلس نقابتك الفرعيه )


- الورقة الاولى:  نقيب عام للمهندسين علي مستوى الجمهوريه (تقدروا تقولو رئيس جمهوريه المهندسين كدا ) ودا هيشترك فى اختياره كل مهندسي مصر فى كل المحافظات بعنى اكتر واحد اخد اصوات على مستوى الجمهوريه هيبقى نقيب عام

- الورقة التانية: بعدين هنختار شويه الاعضاء المكملين على مستوى الجمهوريه ( حاجه كده زى ماتقولو مستشارين للنقيب ) دول 11 واحد من كل شعبه من الشعب الكبيره 2(عمارة – مدنى – كهربا – ميكانيكا ) ومن كل شعبه صغيره ( غزل ونسيج – كيميا – تعدين ) واحد ... دول الى هيمثلو الشعب بتاعتهم على مستوى الجمهورية كلها ( دول كلنااااااا هنخترهم يعنى لو انت مهندس ميكانيكا بردو هتختار 2 عماره و2 مدنى و2 كهربا و2 ميكانيكا و1 غزل و 1 تعدين و 1 كيميا)

- الورقة  التالتة: ( دخلنا فى الصعب بقى ) كل مهندس هيختار ممثلين ليه من شعبته بس
  يعنى لو انت مهندس (عمارة – مدنى – كهربا – ميكانيكا ) هتختار 15 واحد من الشعبه بتاعتك بس 8 فوق السن ( يعنى عدى عليهم اكتر من 15 سنه خبره من العمل فى المجال ده) + 7 تحت السن ( لسه معداش عليهم 15 سنه )
ولو انت مهندس  ( غزل ونسيج – كيميا – تعدين ) هتختار 11 واحد من شعبتك عشان يمثلوك 6 فوق السن و5 تحت السن
v      ملحوظه مهمه كل الى فوق دول هنختارهم على مستوى الجمهوريه يعنى مش شرط يكونوا من المحافظه او تابعين للنقابه الفرعيه الى انت تبعها  

v     الى جاين دول بقى هيبقوا من محافظتك بس وهيمثلو محلس نقابتك الفرعيه الى انت تابع ليها
- الورقة الرابعه: وبعدين هننتخب نقيب المهندسين للمحافظه الى انت فيها كل محافظه او نقابه فرعيه هيشترك المهندسين الى تابعين للمحافظه دى فى اختيار واحد بس بيمثلهم على مستوى المحيط الجغرافى الى بتخدمة النقابة الفرعيه دى

- الورقة الخامسة والاخيره ( الحمد لله وصلنا للأخر ): هتختار 14 واحد من نقابتك الفرعيه عشان يبقوا مجاس النقابه الى انت تبعها ودول هيتقسمو طبقا لكل نقابه هتلاقي التقسيمه مكتوبه على الورقه من فوق

ودى صوره فيها اختصار لكل الكلام ده واعتقد انها واضحه وسهله


اهم حاجه بقى دلوقتى بعد ما عرفت هتنتخب ازاى تعرف اصلا انت ينفع تنتخب ولا لا

عشان تروح ويبقى ليك حق التصويت لازم تكون دافع اشتراك النقابة لحد سنه 2010 على الاقل لو مدفعتش لحد دلوقتى لسه فيه فرصه لحد يوم 22 ومش لازم تروح بنفسك ممكن تبعت اى حد يدفع بالنيابة عنك بس مش هينفع يستلملك الكارنيه تجديد الكارنيه ب 28 جنية
الكارنيه لازم تستلمو بنفسك .... بس ممكن تنتخب بس بالوصل بس لو معاكش كارنيه

واللينك ده عشان تتأكد انك دافع الاشتراك وليك حق التصويت ولا لأ:
http://www.eea.org.eg/mail/lastpaid.aspx

يوم 25 لازم كلنا نتوجه لمقار اللجان بتاعتنا الى هننتخب فيها وكل واحد المفروض يتوجه لمقر اللجنه الاقرب لمكان سكنه الى مدون فى الكارنيه يعنى لو انت من رمسيس تروح المقر الى فر رمسيس ولو من مصر الجديده تروح المقر الى ف نادى الشمس
ودا جدول بالمقرات الى فيها انتخابات كل واحد يشوف انهى اقرب ليه عشان يتوجه ليه لان المهندسين اتقسمو على الجان تبقا للتوزيع للعنوان المدون فى الكارنيه



:D هتروح ومعاك بطاقتك ( ضرورى جدااااااااااااااااا ) والكارنيه ولو لسه معاك الوصل هاته احتياطي بردو مش هيخسر

خلصنا الحمد لله من الانتخاب وهو اصعب حاجه

• ثانيا: المرشحييييييييين:

ندخل بقى على اهم حاجه مين هما بقى المرشحين الى هختار منهم وهما تقريبا ينحصروا فى اربع او خمس مجموعات رئيسية هما الى  متقدمين للأنتخابات المره دى
دا ملخص ليهم والى يعرف او يلاقى حد غيرهم ياريت يضفهم على النوت عشان كلنا نستفاد
طبعا انا حاولت اعمل حصر للناس الى تبع تجمع رئيسي عشان دول سهل اعرفهم انما لو في حد نازل مستقل لوحده فعذرا لو مش حطاه
فى خمس مجموعات تقريبا موجودين
اولا مهندسون ضد الحراسة  ودول مجموعتين بيحملو نفس الاسم مع اختلاف الانتمائات

•       الاول: مهندسون ضد الحراسه ( تجمع مهندسي مصر ) دول مجموعه اخوانية  واغلب الاعضاء فيها اخوان ( دا مش عيب فيهم بس انا بتكلم عن المرجعيات )

•    الثاني: مهندسون ضد الحراسه ( من اجل نقابه مستقلة ) وهماا  فيهم اعضاء من حزب الجبهه الديمقراطي

والاتنين دول كانو فى الاول مجموعه واحده فى محاربه الحراسه وبعد كده انفصلو ومعرفش ليه بصراحه

•      اتحاد شباب المهندسين ( ودول انضمو فى الانتخابات مع مجموعه من اجل نقابه حره عشان شافو انهم لهم هدف ورؤيه واحده )

•      المهندسون المستقلون

•     مهندسون بلا قيود .... ودول اغلب مرشحيهم من اعضاء الاحزاب السلفيه ( وخاصه حزب النور) يعنى نقدر نعتبرهم ذو مرجعيه سلفية

•  واخر مجموعه هيا مجموعه اسمها قائمه التوافق  .... مش معروفه اوى الحقيقه ولسه شيفاها النهارده وحتى مش عارفه   عنها اي حاجه ولا مرجعيتها ولا برامجها  ..... وشعارهم من التحرير الى التعمير وهما مجموعه صغيره نازلين الانتخابات على مقاعد النقيب والاعضاء المكملين بس.

يبقى عندنا 5 قوائم هما الى على الساحه
ü      تجمع مهندسي مصر  
دى البدج بتاعتهم
http://www.facebook.com/egyptianengineerscomp?ref=ts
الجروب بتاعهم
https://www.facebook.com/groups/EGYPTIANENGINEER/
ودا البرنامج بتاعهم
https://www.facebook.com/groups/EGYPTIANENGINEER/doc/267590903285228/
ودى قائمه بأسميهم
 


ü      من اجل نقابه مستقلة 
دى الموقع بتاعتهم
http://dedelherasa.com/blog/
البيدج بتاعتهم
https://www.facebook.com/efis.eg
ودا البرنامج بتاعهم
http://dedelherasa.com/blog/
ودى قائمه بأسميهم



ü      المهندسون المستقلون  
دى البدج بتاعتهم
http://www.facebook.com/almostaklon
الجروب بتاعهم
https://www.facebook.com/groups/almohndson.almostqlon
ودا البرنامج بتاعهم
http://www.youtube.com/user/Almostakloon
و دى قائمه بأسميهم


ü      مهندسون بلا قيود 
دى البدج بتاعتهم
http://www.facebook.com/engineers.free?sk=wall
ودا البرنامج بتاعهم

و دى قائمه بأسميهم فى القاهره

وفى اسكندرية


ü      قائمة التوافق  
دول البيدج بتاعتهم لسه معموله فمش عليها حاجه :)))))))))))

صفحه  عليها برامج المرشحين
https://www.facebook.com/pages/%D8%A8%D8%B1%D8%A7%D9%85%D8%AC-%D8%A7%D9%84%D9%85%D8%B1%D8%B4%D8%AD%D9%8A%D9%86-%D9%84%D9%86%D9%82%D8%A7%D8%A8%D8%A9-%D8%A7%D9%84%D9%85%D9%87%D9%86%D8%AF%D8%B3%D9%8A%D9%86-%D8%A7%D9%84%D9%85%D8%B5%D8%B1%D9%8A%D9%87/156031537808327?ref=ts&sk=wall

اخر حاجه اسامي كل الناس الى رشحت نفسها من على موقع النقابه ... طبعا فى ناس مرشحه نفسها مش تبع اى تجمع ودول كتير مش هقدر احصرهم

آسماء المرشحين على مستوى الجمهورية
 http://www.eea.org.eg/elect_eng/index.htm
آسماء المرشحين على مستوى النقابات الفرعية
 http://www.eea.org.eg/elect_eng/index.htm
جروب برامج المرشحين لنقابة المھندسين المصرية
http://www.facebook.com/?ref=home#!/groups/engineers.lists?ap=1


اخر حاجه احب اقولها عن البرامج الانتخابيه
انا مش هتكلم فيها كل واحد من حقه يقرا البرامج ويختار الاصلح بس هقول حاجة مهمة شايفه ان من واجبي اني اقولها:

اولا المفروض داخل النقابه كل الاعضاء يقلعوا عبائتهم السياسيه قبل ما يدخلو لان العمل النقابي  ملوش علاقه بالمرجعيات ويفترض اننا كلنا بندهف لان نرفع من شان المهندسين فى مصر ونرجع لمهنه من اهم المهن فى مصر هيقوم عليها بناء مصر الجديده من تانى نرجلعها مهنيتها واحترامها للقوانين وتبقى على مستوى يقارن بالدول المتقدمه من اول مناهج الدراسه لحد قوانين التشريعيه الخاصه بمزاوله المهنه ..... ويحاول يوفر اكتر قدر من الخدمات للمهندس عشان يقدر ينتج بصوره اكفا وده الى هيغير بلدنا .... مش داخل مجلس النقابه عشان يبقى عنده سلطه تخدم المرجعيه بتاعته او الحزب الى هو تابع ليه ومش معنى انى بؤيد حزب ما بس برنامجه الانتخابى فى
النقابه مش على المستوى يبقى انتخبهم وخلاص صوتى امانه


ثانيا راي ان البرامج الانتخابيه تقريبا متقاربه وبتدور حوالين نفس النقاط بس فيها البرامج الى كلها كلام بدون خطه واضحه وفيها برامج لها خطه وان مكانتش تفصيليه بس على الاقل واضح فيها بعض الملامح الى توريك الخط الى ناوين يمشوا عليه

وعشان اكون واضحه اكتر فى برامج فيها كلام من نوع ............ سنعمل على رفعه مستوى المهندس ورفع جوده المهنه وتوفير سبل راحه المهندسين لينتحو بصوره افضل وهنهتم اكتر بصحه المهندس .... بدون ما يوضح ممكن ده يتم ازاى

وفى برامج بتكلم فى نفس الحوار ده بس بتقول مثلا هعملهم نوادى اكتر هحط حد ادنى للمهندس هحاول افعل قوانين ممارسه المهنه
هبنى مستشفيات فى الاماكن الفلانيه او هحط شروط لاختيار الاطباء الى نتعامل معاهم


بس فى الاخر وللحقيقه مفيش برنامج تفصيلي اوى او غطا كل الجوانب بالتفصيل




معلش عارفه انها طووووووووووووووويله اوى بس انا حاولت الم كل حاجه متعلقه بالانتخابات ولسه قدمنا شويه ايام نذاكرها

لازم نعرف ان صوتنا مهم جدا
وان انتخابات النقابه جزء جزء مهم جدا من مشاركتك فى الحياه العامه وليها دور كبير اوى فى بناء البلد ومتقلش اهميه عن انتخابات المجالس او الرياسه
وربنا معانا

وشكرااااااااااااااا وجعت دماغكو



م. هدى حسنى

التلفزيون المصري حصررررري

طبعا لو سألتك بتشوف التلفزيون المصري هتقولى لا
عندك حق والله وربنا رحمك انك مش بتشوفه بس اليومين دول بقى التلفزيون المصري فعلا اتغير
صدقنى والله فعلا اتغير اتغير تغير رهيب ومريب
بعيد عنكو كده
سبحان اللــــــــــــــــــــه التلفزيون المصري اليومين دول ميبستضفش غيرالاخوان المسلمين و الاسلامين عامتا وبقى كلامهم زى العسل على قلبه مع ان اليومين الى فاتو كانو مبهدلينهم وشايفنهم الكخه والى بيعملو ويسوا وهيبوظوا مصر وعايزين فتنه
فجأه بقدره قادر الاخوان والاسلامين بقو زى الفل وهما بس الى بيقهوا ولازم نسمعهم وتلاقي مزيع لذيذ يقول واحد من ضيوفه الفرق بينك وبين فلان ان لحيتك اطول شويه
خلاص بقت اللحى دلوقتى حلوه؟؟؟
مش كانت تطرف من يومين؟؟
بردو مش كل ده الى انا مستغرباه الاعلام المصرى زي ما كلنا عارفين اعلام زباله من يومه وزى ما كان بينافق مبارك دلوقتى بينافق المجلس العسكرى ومن كام يوم كان بينافق الثوار بس لاقى الموضوع مبيكلش معاهم فغير
المستفز لما تلاقى طول النهار والليل كل الضيوف على كل البرامج على كل القنوات ضد التحرير والمظاهرات على طول الخط
والمجلس العسكري خط احممممممممممممر
والجيش ده هو الى بقيلنا وكاننا هنلم كل المجندين فى الجيش على المجلس على طنطاوى فى حله ونولع فيهم

اهدى بس كده وروق الجيش ده على عينى وراسي واحنا معلقناش مشنقه ليه عادى بننتقده ولا هو ربنا على الارض حرام انتقاده؟؟؟

المهم نرجع لموضوعنا كل الى فات ده شئ طبيعي ومتوقع من اعلامين هما هما من قبل الثوره وطول عمرهم منافقين
امال ايه هو الجديد والحصري بقى؟؟؟؟؟؟؟؟؟؟؟؟؟؟؟؟؟؟

حقيقى حقيقي الجديد والحصري موقف الاسلامين بقى من التلفزيون!!!!!!!!

الغريب ان الاسلامين الى كانو متبهدلين تدخل عليهم الحركه الزباله دى من الاعلام ..... يا مؤمن دول من اسبوع كانو بيتهموهم بكل حاجه هتخرب البلد واانهم وانهم وبيعملو ويسووا واصلهم بيضحكو على الناس
وكانو يجيبوا واحد اسلامى ومعاه عشره معارضين ليه عشان يحطوه فى خانه اليك ويعينى الراجل ميبقاش عارف يلاقيها منين ولا منين
خلاص؟؟؟؟؟؟؟؟؟؟ اول متجيلك دعوه من التلفزيون تعالى وهتقول الى انت عايزه تجري عليه على طول؟؟
نسيت عملو فيكو ايه؟؟؟
نسيتو انهم كانو لحد من يومين فاتو شايفين ان حزب العداله والحريه حزب بتضحكو بيه على الناس عشان تنزلو الانتخابات الرئاسيه بعد ما الاخوان وعدتهم بعدم نزول الانتخابات؟؟

خلاص السلفيون نسيوا انهم كانو بيقولوا عليهم هيقفلو التلفزيون ويمنعوا الموسيقى والممثلين وهيقعدوا الاعلامين في بيوتهم؟؟؟

ولا دى كرم اخلاق الاسلامين؟؟؟؟ ;) ولا المسامح كريم بمناسبه رمضان بقى وكل سنه وانتو طيب؟؟؟؟

ولا الناس دى اضحك عليها بالسهوله دى وعدت عليهم وصدقوا ان التلفزيون اتغير

ولا هما بقى ماشين بنظام الى نغلب بيه نلعب بيه
وما دام التلفزيون هيبقى معانا وهيسيبنا نقول الى احنا عايزينه ونعارض الى احنا عايزينه ونروج لفكرنا فى الايام الجايه يبقى اشطه مفيش مانع ننسي الى فات وعفا الله عما سلف؟؟؟

انا لا اشكك فى وطنيه احد فما لا ارضاه لنفسي وما اعانى منه انا وزملائي" كل اعضاء ميدان التحرير الكرام ولا اقصد فصيل سياسي بعينه الان" لا اقبل ان يكون غيري فيه ويعانى ما نعاينه
ولا اقبل بزج احد فى هذا الموضع السئ ولا اخفيكم انه في منتهى السوء وخصوصا مع شعب طيب وبسيط كشعب مصر
يحبها حبا جما ويخاف عليها من لهوا الطاير وبيحب يحرص :))))

ولكن حقيقى اتسأل كيف لهؤلاء المحنكين سياسيا ان يقوا فى ذلك الفخ

اذا كانو يظنون انهم الرابحون فلينظرو الى الوراء بضعه اشهر فقط عندما كان التلفزيون يتخذ نفس الوضع العدائي ضد الثوار ومع النظام
والان يعود الى نفس الوضع ضد المتظاهرين ومع النظام ايضا
اتمنى من الجميع ضبط النفس واعاده ترتيب الاوراق وقرائه الاحداث قرائه صحيحه

ايه النظام

ازي (كيف حالك يعنى بالعربى) اى حد هيعدى من هنا

طبعا بولا مستنى ايه الى حصل للبنت بعد المكالمه اوعدك يا بولا والله لو فضلت عايشه بعد يوم الجمعه اعمل الحلقه التانيه

الحقيقه عايزه ابدا بحاجه مهمه اوى على طول فى الموضوع ان فى ناس اختلط عليه الامر فى ناس اختزلت النظام فى شخص الرئيس وفي ناس ربنا فتح عليها شويه ووسعت الدايره شويه ودخلت مع الرئيس ربنا لا يرجعه ولا يسامحه الحكومه وشويه ناس فى الشرطه ودول الحمد لله احسن من الاولانين وفى ناس بقى ايدها مبحبها اوى وادخلت الدستور فى الدايره ودول اضربو بعد الاستفتاء

المشكله بقى ان النظام هو ليس الرئيس وليست المجالس التشريعيه وليس المجلس العسكرى وليس الجيش -- وبالمناسبه الجيش حاجه والمجلس العسكرى حاجه بدليل ان الناس فى المظاهرات قالت الجيش والشعب ايد واحده مش الجيش والمجلس ايد واحده -- وليس الحكومه او رئاسه الوزراء وليس الشرطه وليس ايضا القضاء

امال هو ايه النظام يعنى وجعتنى دماغنا بـ وليس وليس

اصبر بس ..... اقولك يا سيدى النظام ولمؤخذه هو كل الحاجات دى مع بعضيها معاهم كمان اسلوب وطريقه اداره الحكم فى البلاد الى هيا لامؤخذاه بردو اداه الحكام لاداره شئون البلاد ودا بيكون عن طريق دستور وقوانين وتشريعات ومجالس نيابيه وحاجت كده
ايه المشكله بقى بردو مفهمناش يعنى

المشكله ان احنا هتفنا فى الميدان لاسقاط النظام وفاكره كويسه انى كنت من الناس الطيبه الى كانت كل ما تيجي تهتف الشعب يريد اسقاط الرئيس الاقى صوت عالى من بعيييييييييييييييد ينادى الشعب يريد اسقاط النظام وشويه شويه الناس كلها ترجع تهتف معاها ساعتها كنت اسأل نفسي فرقت يعنى عشان يحرجنى كده نظام رئيس المهم الى اسمه ايه ده يمشى ويسيب الحكم وخلاص .... يمكن محستش اوى بالفرق ومركزتش اوى غير لما فعلا مشي وفرحنا واحتفلنا ونضفنا الميدان والمجلس جه واستفتينا على الدستور والدستور اتغير بس مش اوى وابتدت المحاكمات وبعدييييييييييييييييييييييييين ولا ابلين وكانك يابوزيد ماغزيت ولاعملت اى حاجهيا معلم

 ليه بقى ما المحاكمات شغاله والريس فى المستشفي يارب يشفثيه ويشيل عنه عشان يتعدم وولاده والوزرا وقضيه خالد سعيد من سنه فى المحاكم - ولا كانها قضيه نفقه -ووعملنا استفتاء والناس اختارت نعم الى بقدره قادر بعد ما الاستفتاء خلص طلعلنا فقهاء "الـ اى حاجه" وقلولنا ان الناس قالت نعم على المجلس العسكرى ونعم ان المجلس يحط هو دستور مؤقت ونعم ان انتخابات المجالس الاول ونعم فى وش الوحشين الى كانو عايزين مجلس رأسي( مع الاحتفاظ برأى فى المجلس الرئاسي)  ونعم عشان الماده التانيه ونعم هتحافظ على "مش عارف ايه" واخيرا نعم للمواد التسعه الى اتعدلو وكأن ال80 مليون الى سمعوا عن الاستفاتاء كانو بيقروا اخبار كولالمبور مش مصر او هما الى نظرهم ضعيف ومقروش كويس .. طبعا دلوقتى ناس ابتدت تزمزق ومش عاجبها الكلام من فضلك يا اخ كمل للخر واشتم مره واحده على بعض :)))

ما علينا ايه بقى الى مزعلنى ؟؟؟؟؟؟؟؟؟ كل الكلام الحلو دا على عينى وعلى راسي وكله فعلا اتحقق

امال ايه بقى؟؟؟

اقولك كل ده حصل ماشي بس بنفس النظام السابق يعنى ايه؟؟؟ يعنى لما انزل استفتى على الدستور ويطلع اللواء ممدوح شاهين قبل الاستفتاء بيومين ويقول نعم يبقى هنعدل التسع مواد انما لا بقى معانا هنحط احنا دستور ومش هناخد رأيكو فيه فالناس تنزل من الرعب تقول نعم لحسن يحطو دستور وحش وبعد الاستفاء بردو يحطو دستور من غير ما يخدو رأينا اعتقد ان ده مش طبيعى صح؟؟ بلاش

يعنى لما يطلع فى الجرايد قبل اعلان تسجيل مبارك الاعتذار بيوم يقول مصر هتنزل تشحت من بكره وكل واحد هياكل دراع الى جنبه عشان الاكل خلص وتانى يوم يعلنولنا ان مبارك هيعتذر وعفا الله عما سلف يبقى مش عادى

يعنى لما الناس تغضب وتثور عشان سوزان خرجت ومبارك هيعتذر يطلع تانى يوم تكذيب من القوات المسلحه- مش انا يا بابا لا لا مش دى مش احنا الى قلنا كده ولا دى بردو اه افتكرت يقوللنا العدل سوف يأخذ مجراااااه واحنا مش هنتدخل والمجلس مش من اختصاصاته العفو عن مجرم يبقى مش عادى صح؟؟

يعنى لما ينتشر على النت فيديوهات بلطجه بعض افراد الشرطه الفاسده طبعا مش هتصدقوها انا بردو مصدقتش بس بردو مش عادى

يعنى لما يتكرر اسامى مديري امن بعض المحافظات الى اتضرب فيها الثوار وكل الى حصلهم بعض الترقيات لمكان تانى يبقى مش عادى ابدا

يعنى لما تختزل كل عمليات القتل دى 850 بنى ادم فى مصر لمحاسبه امين شرطه _ حتى الظابط الى اداله امر الضرب لسه متحاسبش - لا وايه كمان امين شرطه هارب قتل 18 بالاعدام يبقى غطيننى وصوتى عليا يا ماااااااااا 18؟؟؟؟ يعنى فيه لسه 832 محدش اتكلم عنهم داحنا حتى لسه مكسرناش ال800 لا وايه امين شرطه وهربان

بصو الحته الجايه دى بقى

ان ان اناااااااااااه

يعنى لما الناس تبدا تكلم عن مظاهرات من تانى يوم 27 عشان المجلس يتعدل ويمشي صح ويعرف اننا فايقين  يطلعلنا المجلس برساله اسمحولى اقول انها ساذجه واوى كمان يقولنا فيها اوعو تسمعو كلام الوحشين الخونه الى بيوقعوا بنا احنا زى الفل وسمن على عسل واحنا بنعملكو كل حاجه حلوه عشان احنا بنشوف احسن منكو ومتسعوش العملا الخارجين دول واعتقد ان دى هتكون ذريعه ضرب المتآمرين يوم الجمعه ويارب اكون غلطانه بحجه انهم خونه يعملون على زعزه امن الوطن والتفريق بين اطيافه والوقيعه بين الجيش والشعب ودا كان مضمون رسالتهم على الفيس بوك_وهنا عايزه اقول حاجتين الحقيقه...... الاولى ان انا ضد التسميه بتاعه الثوره التانيه لان الاولى لسه مخلصتش ولان اصلا الثوره عمرها مابتبقى شهرين ولان التسميه دى تعنى ان الثوره الاولى فشلت ولانات كتير بصراحه منهم بردو ان احنا مش هننقلب على الجيش او المجلس احنا بس بنفوقه وبنقوله ان احنا موجودين

ثاينا ان خروجنا فى مظاهرات ضد المجلس العسكرى لا يعنى معاداه الجيش لان الجيش ده الى هو كل العساكر والظباط واللؤات اخواتنا وابائنا واهالينا الى بيحبو مصر اوى يمكن اكتر مننا كمان لان الجيش حاجه والمجلس العسكرى الى هو قياده الجيش حاجه زى بالظبط ما المصرين حاجه ورئيس المصرين السابق كان حاجه تالته خاااااااالص

الجيش والشعب هيفضلو كيان واحد لكن للأسف القيادة انفصلت عن الكيان ده وقررت بكامل إرادتها تولى دفه الحكم ودا يعنى إن المجلس العسكري مبقاش جيش بقى رئيس من حقنا نراجعه ونعارضه ونصحصح له أوضاعه ونواجهه ببعض الأخطاء الى يجوز وقعوا فيها دون قصد ......... ومن حقنا ايضا ان نثور عليه كما ثورنا على رئيسنا السابق واعتقد ان ده لو حصل الجيش ايضا سيحمينا من قادته كما حمانا من الرئيس كما سيحمينا من اى عدوان خارجى او داخلى..... وعشان احنا الجيش وإحنا الى ونحمى البلد ويوم ما الجيش هيقولو مساعده هيقف 85 مليون راجل معاهم  -  كل ده اكيد كبنا قرناه واكيد كلنا حسينا بيه بس في منا عداها عشان المركب تمشى وفى منا مخدتش بالو اوى كان لسه فى غمره الفرحه بانتصار الثوره وفى منا مش عايز يصدق او يقتنع بس لحد هنا ولازم نقف ونلاتب ورقنا ونفكر تانى قبل ما الثوره تضيع والشهدا واهليهم والمصابيبن يطلبو من ربنا حقهم الى احنا ضيعناه

انا كل الى بعمله انى بفكركو بس وكل واحد يعمل الى شايفه صح بس قبل ما تقفل وتقول انى عميله اعد مع نفسك وفكر وراعى ربنا واعرف انه شايفك وحد نفسك مكان اى واحد فقد بصره او قدرته على الحركه وهو فى عز شبابه شاب زى الفل دكتور ولا مهندس ولا محاسب ولا محامى كلن كل حلمه البلد تغير للاحسن عشانا كلنا ويمكن يكون هو كمان مكنش مضرور من الى حصل بس عمل كل ده عشانك

تفتكر كنتت ممكن تقول سيبو المجلس يشتغل ولا كنت هتدعى على الناس الى ضيعت حقك؟؟

عجبنى او تعليق قريته حد كان كاتب

موقفنا من المجلس زى موقف الست الى متاكده من ان جوزها بيلعب بديله وبيخونها بس خايفه تكلم لتخرب البيت

مش معنى كده انى بخون المجلس بس هو بيعمل حاجات غلط لو كان مش واخد باله ( مع ان ده اصلا لا يجوز) ادينا بنفكره ونعرفه ولو كان واخد باله تبقى مصيبه وادينا بنعقله

وعشان كل الكلام الكتير ده انا نازله يوم 27 ولازم كل واحد خايف على البلد دى وبيحبها ينزل مش عشان يسقط النظام ولا عشان يعادى الجيش

بس عشان يطالب بعداله ويطالب بديمقراطيه ويطالب بحق كل واحد ضحى فى سبيل الى وصلناله

معلش طولت عليكو بس الموضوع خطير

 ربنا ينصر مصر بينا ونشوفها فى اعلى مكان

مكالمه تليفون

مش عارفه ابدأ ازاى بس ان اهدخل فى الموضوع على طول

تفتكرو ايه وقع كلمتين حلوين من اى كائن يلتصق به صفه " ذكر"_ وما اكثرهم في هذه الايام _ على فتاه لم تكلف نفسها اى خسائر- بقحم نفسها فى علاقه عاطشفيه - فى اى من المراحل السنيه " المناسبه لذلك" وطبعا معروف ايه هيا المراحل المناسبه لذلك زمان كان بيبقى يأما فى ثانوى مع اى مدرس جان كده وابن ناس بيسرح شعره ويحط ريحه قبل ما يروح المدرسه ياسلام بقى لو كان صغير شويه او حتى كبير من ابو شعر ابيض دول الى البنات بيقعو جنبهم اول ما يشفوهم ... يا اما مع ابن الجيران او زميل الدراسه فى المدرسه الى جنبهم لزق وتلاقى الحكومه الله لا يرحمها كانت دايما تحب تلم شمل المجتمع وتحب توقع راسين فى الحلال فتلاقى كل مدرسه بنات جنبها واحده ولاد فى نفس المرحله عملا بمقوله العالم قريه صغيره ولست بمفردك تحيا فى هذا العالم وكلنا جنبك  قال يعنى لو نقلوها الشارع الى بعدها هيحصل مشكله فى المرور ....

يأما فى مرحله الجامعه الى هبا حته كده كل بنت لقت نفسها اذ فجأتن فى مكان كده خير اللهم مجعله خير مليان ولاد من كل لون فى كل حته وراها وادامها وعلى السلم وادام الباب وكأن قجأه ماسوره ولاد انفجرت فى المنطكه دا غير بقى المعيدين والدكاتره والفراشين حتى _هو يعنى كان حد لاقى احم احم _ المهم انها فى وسط غابه من الرجال

طبعا يا جماعه لا اخفيكم ان دا كان زمان اوى دلوقتى العيال مدردحه مش زينا خيبه ومفيش بنت بتخرج من مدرسه الابتدائى الا وهيا معلقه واد من مدرستها والحب بقى بيبدء من كجي وان

المهم  نرجع مرجعنا للسؤال تانى

تفتكرو بقى ايه وقع الكلمتين الحلوين على البنت المسكينه دي الى يا عينى عمرها ما سمحت لحد يقولهملها ابدا ولا حتى وقفت تسمعهم وتشتمه بعديها

وطبعا ده عشان هيا وحده خيبه قصدى واحده محترمه وبنت ناس وكده زى مانتو عارفين يعنى وكده عيب بقى والكلام الحلو ده الى اعتبره من اكبر اسباب العنوسه فى مصر( طبعا دا تهريج)

المشكله ان الكلمتين دول بقى جم بعد ما اتخرجت واشتغلت ونظرا لأزمه الجواز فى مصر قربت تعنس حتى لو جم عن طريق مكالمه واحد غلس طل الرقم غلط فى التليفون؟؟؟؟؟

تفتكروا ايه تأثيرهم عليها وممكن يجرالها ايه

الحلقه الجايه ان شاء الله هحكيلكم فيها ممكن يجرالها ايه

:)

عمار بن ياسر وكاميليا بنت شحاته

السلام عليكم يا اهل مدونتى الكرام بصراحه فى موضوع مهم اوى كان لازم اتكلم فيه لان احنا فعلا فى ازمه والكل بيتكلم
مكنتش اتمنى ادخل انا كمان فى الخط بس لقيت كلام كتير حاسه انى لازم اقول حاجه يمكن ربنا يهدى بيها حد فى الظروف العصيبه الى بتمر بيها البلد
انا مش فقيها فى الدين ولا حتى فى الدنيا انا امه فقيره لله فى كل شئ حتى فى العلم رزقنى الله علمه يارب
بس من معلوماتى القليله دى الى مرت على كل واحد فينا بس هو يمكن مخدش باله كويس
عمار بن ياسر احد صحابه النبى ومبشر بالجنه هو واهله كلهم لما ذهب لرسول الله صلى الله عليه وسلم وقاله اجبرونى وعذبونى حتى نطقت بالكفر 
ماذا رد خير خلق الله عليه؟؟أتى عمار رسول اللّه (ص) وهو يبكي، فجعل رسول اللّه (ص) يمسح عينيه ويقول : (ما لك ؟ إن عادوا لك ، فعُد لهم بما قلت)
لان قال تعالى : (من كفرَ بِاللّهِ مِن بعدِ إِيمانِهِ إِلا من أُكرِه وقلبُهُ مُطمئِن بِالإِيمانِ ولكِن مَن شرحَ بالكُفرِ صدراً فعليهِم غضب مِن اللّهِ ولهُم عذاب عظِيم)
بالله عليكم اذا كان رسول الله رخص لعمار النطق بالكفر مادام قلبه مطمئن بالايمان لدرء اذى عن نفسه فقط
تخيلوا بقى لو الاذى لبلد بحالها؟؟؟؟؟
لو ان كمليا شحاته او وفاء قسطنينتين او ميت واحد وواحد زيهم فعلا قلبهم مطمئن بلايمان للأسلام واجبرو على التنصر فأسلامهم عند الله
وبردو انهم اجبرو على الاسلام وقلبهم مطمئن بالمسيحيه فمسيحيتهم عند الله
اعتقد ان لو رسول الله بيننا لما رضي بالفتنه لاجل فرد فى ظروف مثل ما تمر به بلدنا الان
بالله عليهم هل الان وقت مناسب عشان نتخانق دى مسلمه ولا مسيحيه انا من راى ننسي اننا عرفنا واحده اسمها كاميلا اصلا ونضع الامر برمته جانبنا وننتبه لامور بلدنا حتى يستتب الامر ويبقى لينا رئيس زى باقى البلاد وحكومه ومجالس ودستور وبعديها يبقى ربنا يسهلها ونشوف ازاى هنظم ونقنن حريه الاديان فى مصر
طبعا بعد سحب السلاح من اى فئه فى الشعب واستتباب الامن وبعد ما نلم كل البلطجيه فى السجون تانى
اعتقد ان الى بقوله كلام مش صعب ولا غريب واتمنى من الله الا يكفرنى احدهم بدعوى انى بتخلى عن اخواتى المسلمات
وتذكرو ان في صلح الحديبيه كان رسول الله يرد من اسلم من قريش لهم
اتقو الله فى مصر ايها المصرين
رفع الله الغممه عن بلادى ورزقنا خيرا واتم عليها امناها وتذكرو ان مسلم مسيحي موااااااااااااااااااااااطن فى مصر
كل من هو على ارض هذا الوطن له حق المواطنه وله حق الحياه الكريمه بغض النظر عن الجنس واللون والدين يا امه ان شاء الله عمر ما هيضحك من جهلها الامم تانى
ربنا ينصرك يابلدى يا حلى بلد فى الدنيا

السلام عليكم يا اهل جمهورية النت الديمقراطية

بما انى جديده فى الخط
قلت اتعرف عليكو واعرفكو على مدونتى الوليده .......... مدونتى عندها دلوقتى ماشاء الله بتاع خمس دقايق ربنا يخليهالى وتكبر كده وسطيكو
انا بقى واحده من هنا او هناك حسب مكان القارئ العزيز ........ كل ما افتح النت ينط فى وشى مدونه فلان او فلانه حسيت فأجأتن انى انا الوحيده فى هذا العالم الصغير التى لا تمتلك مدونه خاصه قلت فى عقل بالى يا بت الى ملوش مدونه يتسند عليها فى الزمن ده مش هيعرف ياخد حقه واهو بردو تعملك شويه برستيج كده وسط الناس ويقولى المدونه راحت المدونه جت
لقيتنى اذ فجأتن بردو بفتح جوجول - بعد ما تصفحت بعض المدونات القريبات الى قلبى لبعض الناس -  وبقوله نفسى فى مدونه زى الناس الحلوه ديه لقيت الراجل بيرحب وبيقولى المدونات هتشرف وتنور والله ...... قلت على بركه الله
دّخلت كل البيانات وكل الحاجات الى جوجل بيه طلبها منى ورحت دايسه انتر
ان ان ان ( دى الموسيقى التصويريه )
راح فتحلى صفحه وقالى دخلى اسم المدونه - مكدبش عليكو - فجأه لقيت الارض بتلف والدنيا بتدور ومبقتش عارفه اقوله ايه معملتش حساب اللحظه دى قعدت اقول اسميها ايه اسميها اية - طبعا وانا حاسه احساس الام الى صحيت لقت نفسها مخلفه ولسه مخترتش اسم المولد - قعدت افكر افكر وكل مكتب حاجه اقول ايه ده لا وحشه وامسحها ........
لحد ما عقلى الفصيح هدانى للأسم المناسب لما سوف تقرأونه هنا بأذن الله وهو ما يدور عادتا فى عقلى الصغير
احم احم
الا وهو الـ خزعبلاااااااات بسأل جوجل ايه رأيك قالى مش انتى لوحدك يافالحه الى مشاء الله تملكى هذا العقل العبقرى فهذا العالم الصغير ملئ بأمثالك الموهوبين المتفزلقين - صدقونى قال عليكو متفزلقين - وسمو مدوناتهم قبلك خزعبلات شفيلك غيرها
مكدبش عليكو بردو حسيت بكبسه وحشه اوى وقررت انى اكبس جوجل واعرفه انى مش زى ما هو فاكر
قعدت افكر افكر واعصر فدماغى وفجأه لقيته بيقولى - عقلى يعنى - خلاص هما بيكتبو خزعبلات فى العموم سميها انتى خزعبلات المجنونه طبعا زعلت منه اوى ازاى يقول عليا كده .
وفجأه لقيت الاسم نط فى وشى صحيح الى بكتبه هو خزعبلات بحس بيها وبتعدى على عقلى ومش بلاقى حد يسمعها فقلت ابليكو بيها ولكم الاجر والثواب لكن هيا فعلا جوه وطن افتراضى لكن ديمقراطى فيه ناس بتقابل بعض وتحب بعض وتخاصم بعض ومن حق اى حد يعترض على اى حد ويعمل الى هو عايزه فى الوقت الى هو عايزه ومن غير ما حد ينكد عليه ويقوله لا يجوز فجأه لقتنى بقول لنفسى صحيح انا هكتب خزعبلات لكن تكريما لمن اتاح ليا هذه الفرصه العظيمه هقرن اسمه بأسم ابداعاتى الى هيا الخزعبلات
لقتنى بكتب خزعبلات فى الجمهوريه الديمقراطيه
لان النت فعلا هو الديمقراطيه الجمهوريه الحقيقيه الى بتجمع كل العالم فى مكان من حقهم يشتمو بعض فيه من غير ما يدخلو السجن
لقيت ان النت لازم يتكرم ويتكتب جنبا الى جنب مع اسم مدونتى العبقريه مكدبتش خبر وقلت لجوجل ايه رأيك ياعم جوجل
قالى اشطه عليكى يا كبيره اسم جامد بيس دوسى اوكيه بقة وخلصينا فى ليلتك دى - واضح ان جوجل كان زهق وبيطفش - المهم مكدبش عليكو دوست اوكيه وانا رأسي فى السماء شموخا بالاختيار العبقرى للأسم وفجأه لقتنى هنا بكتبلكو هذا الموضوع الخطير كتجربه للتدوين ولاول مره
ايه الرغى دا كله وايه كميه المفاجات الى نا فيها دى معلش يا جماعه اعذورونى انا جديده فى الخط وفرحانه بالكي بورد اصدى بالمدونه
عموما رحما بكم وعشان متكونش اخر زياره مش هكتب حاجه تانى النهارده كفايه كده
فرصه سعيده اتمنى اشوفكو كتير
والسلام عليكم ورحمه الله وبركاته