يا عسكري .. شعر منقول D:

يا عسكري واقف بالفرس على جتتي ..
لا انت البطل ولا انت فتوة حتتي ..
يوم ما تقول هاخد البلد ..
هقولك خدها بس على جثتي


يا عسكري بالبندقية
ما هتقدر تحجب قرص الشمس اللي جاية ..
وإن يوم طلعت رصاصتك في قلبي ..
هموت أنا ..
بس عمر ما تتقتل القضية

يا عسكري كتف إيديا ,
و امسح حروفي من شفايفي
و غمم عينيا ..
لكن اوعاك تفكر إني ممكن أنحني
و تركب عليا

يا عسكري رصص جنودك .
كبِّل إيديا و إملا بينا سجونك ..
لا عمرك هتشوف دمعتي
ولا عمر قلبي يعيش في كونك

يا عسكري كسّر كمان
و شخبط على رسمي
و امسح جدران ثورتي
و غيّر حروف إسمي
زي ما شافه مبارك
بكره تشوف حسمي

يا عسكري إكدب كمان
زي ما كانوا بيكدبوا أيام زمان
فكرك ممكن ارتجع
و الشهيد واقف يراقب م الجنان !

اديني بلدي و دولتي
وارجع مكانك
أديك آمان

انا شجاااااااعة

يوم 18/1/2012

طبعا العنوان ما هو الا تشيع ليا عشان ابدا الخطوة الى بعدها لكن فى واقع الامر الى هتقروه ده لا يعبر عن الشجاعة بأي حال من الاحوال

مروحة من الكورس بليل الساعه 9.5 ركبت ميكروباص قعدت جنب واحد، راجل قاعد شكلة راجل طيب ومحترم كبير بس مش أوي شكل أب يعني ومواطن مطحون، وقلت شكله محترم ومش هيضايقني قعدت جنبه وانشغلت بالطريق
بعد شوية جسيت بأيده  بترمي طرف الجاكت بتاعه على رجلي بصيت لقيت فعلا طرف الجاكتب بتاعة على رجلي مع ان فيه بيني وبينه مسافه ... ولانى هبله اقنعت نفسي دا شكله محترم وكبير مش معقول يعني يكون ناوي يضايقني
فخرجت بعيد عنه شويه احتياطي بردو بس معملتش حاجة
شويه وحسيت انه قرب مني او اقرب رجله ... فبعت شويه كمان
يعدها حسيت ان فعلا كان عندى حق لاني حسيت بإيده بتقرب مني بس الحمد لله ملمسنيش ولما بصتله لقيته بصلي وفي عنيه خوف رهيب وراح عدل نفسه وبص الناحيه التاني
كان واضح انه اول مره يجرب يتحرش ببنت وانه خايف يتفضح لو اتكلمت وخايف من رد فعلى

كنت بالفعل خلاص قربت وهنزل رحت قايله للسواق على المحطه ورحت بصاه وقيلاله على فكرة انا كان ممكن اخدك على القسم دلوقتي بس انت شكلك محترم وأول مره تحاول تضايق حد وشكلك كبير وعندك عيال وعشان كده انا هعديهالك المره دى عشان مفضحش ولادك

بصلي وهو بيتلجلج في الكلام ويقولى بتكلمينى انا ... انا  انا عملت ايه وفي عين نظره رعب رهيبه

بجد حسيت انى فرحانه أوي وشفيت غليلي منه خت حقي بإنه كان هيموت من الرعب
خدت حقي لما شفت في عنيه رجاء انى مفضحوش اكتر من كده

قلت الكلمتين ونزلت وفضل هو باصص عليا بعد ما نزلت فى دهشه وخوف من رد فعلى الى مكنش متوقع وخصوصا انه فعلا معرفش يعمل حاجة

بس انا استفدت حاجه اهم من كل الى فاتت انى لاول مره اواجه الحيوان الى بيحاول ينتهك حقوق البني ادمين وقررت ان المره الجاية هتبقى المواجهة حقيقية وهاخد منه حقي بجد وان مكنش بالقانون يبقى بإيدي

واخيرا احب اقول لكل بنت بتقول مش للدرجادى ولا اتجحبي واحمي نفسك او متمشيش لوحدك واخرجى الصبح وكل الكلام الى بيضحكوا بيه على نفسهم دا
حضرتك واحده من اتنين
يا هبله ومش فاهمة فبيتم التحرش بيكي يوميا تقريبا بس مع هبلك انتى مش فاهمة
يا اما بتنافقي نفسك عشان تقنعي نفسك انك كويسه وكرامتك فى مكانها والناس بتحترمك او عشان تمشي حالك وتعرفي تعيشي او عشان مش عارفه تواجهى اهلك والى حواليكي وخايفه من نظرات العتاب ةاللوم في عنيهم
بس ادخلى أوضتك واقفلى بابك على نفسك وواجهى نفسك بالحقيقة واعترفي ان الى بيحصلك ده مش طبيعي ولازم تواجهيه بأي طريقه بدل ما تتجنني وتموتي واحب اطمنك انتى مش لوحدك و لا احنا قله
لان سواء كنتي وحشه او حلوه طخينه او رفيعه لابسه اسع او ضيقك ... احنا في مجتمع بيعتبر النساء سلعة ومن حق الجميع يقلب فيها ويتفرج ... مجتمع بيعتبر البنت ما هيا الا وسيله لاشباع غريزته ... وبيعتبر النساء للجميع

المجتمع دا محتاج ياخد بالقلم على وشه عشان يفوق وانا قررت انى اكون الايد الى هتفوقه .... وانتى معايا ولا راضيه بالامتهان؟؟؟
قولي بصوت عالى من غير ما تخافي لا للتحرش الجنسي والى يقربلك اقطعي ايدو

بالنوسبة بقى للرجاله فهما بردو نوعين
نوع بيقول مش للدرجادى يعني انا مشفتش قبل كده تحرش بالشكل دا في الشارع وانتو بتكبروا الموضوع عشان تكتبوا
ودا مش هرد عليه حفاظا على ان المدونه تفضل +13

والنوع التاني معترف بوجود التحرش وانه بيشارك فيه على أقل تقدير بالمشاركه السلبية ودول بقولهم سواء متحرشين او متفرجين حسبي الله ونعم الوكيل فيكوا يارب اشوف فكل واحد فيكو يوم واتشفى فيه واقف اتفرج زي ما هو وقف يتفرج علينا واحنا بننتهك
ولكل واحد مد ايدو او لسانة مبروك اختك وامك الاتنين بيتهانوا كل يوم وانتظر مننا نار جهنم على الارض قبل ما تشفها في الاخره

أتوبيس نقل عام

ساقني حظي العثر اليوم، في طريقي لأحد المراكز الحكومية -للأسف-، أن استقل إحدى حافلات النقل العام وليس "أتوبيس خاص" أو"ميكروباص"، وبالرغم من ذلك فإن سائق الحافلة كان يتعامل كما لو كانت سيارته الخاصة.

وبغض النظر عن الارتفاع المفاجئ وغير المبرر لسعر تذكرة الأتوبيس، إلا أن هذا لم يكن سبب استيائي وألمي، وبغض النظر أيضا عن معاناة المصريين في المواصلات العامة والمرور يوميا، إلا أنني كنت مع موعد لانتهاك جديد من الانتهاكات اليومية لحقوق الإنسان التي يتعرض لها مستقلي المواصلات العامة يوميا.

فبمجرد صعودي للحافلة اخترقت أذناي، أصوات عجيبة وضوضاء رهيبة، لكني لم أتبين كنه هذه الضوضاء في بداية الأمر، ربما لانشغالي بدفع الأجرة، واختيار أحد المقاعد. وما أن اتخذت مقعدا وجلست، حتى تبينت جيدا مصدر الضوضاء، لقد كانت إحدى أغنيات مطربي "التكاتك" و"الموكروبازات"، والتي أصر السائق أن يسمعنا إياها مع عدد أخر لا بأس به من أغاني نفس "الألبون" طول مدة الرحلة حتى وصولي للجهة الحكومية التي قصدتها.

ما أزعجني وألمني في كلمات أولى هذه الحماقات -فلا يجوز وصفها بالأغاني- وبغض النظر عن سوء وبشاعة الموسيقي وما سببته لي من توتر وإيذاء نفسي، والصوت المرتفع بدرجة لا تحتمل، والشخص صاحب الصوت البشع الذي يردد تلك الكلمات، إلا أن صدمتي كانت في كلماتها التي حملت كثير من التعبيرات مثل ثورة يناير والتحرير والحرية، وسط مجموعة أخرى من الكلمات البذيئة التي يتلفظ بها صاحب الأغنية.

كانت كلمات الأغاني المتتابعة تحمل من البذائة قدرا لم أعد أتحمله، كلمات بها كثير من إساءة الأدب، -انتقيت لكم أكثر الكلمات أدبا واحتراما لأضعكم معي في الصورة فربما لا يمكنكم تخيل ما سمعت، كان من بين الأغاني أغنية تبدا بـ "نحن نريدها هلس نريد خرابا دائما...خمرة وبانجو ورقص...نريد شبابا ضائعا" وأخري يتباهى فيها المغني بأنه "سكران وشارب سيجارتين"- ثم تطورت الكلمات لما هو أفظع من ذلك فأصبحت تحمل بعض الكلمات الخادشة للحياء.

إذا عجبك المقال ففضلا يمكنك معرفة ما قمت به من خلال الرابط التالى
المقال منشور على موقع مصر بلدنا وحقوق النشر محفوظة
http://misr-baladna.com/hoda-hosni/the-bus

خاطرة

أشتقت أن تداعبني  إبنتي الصغيرة بيدها الصغيرة وأناملها الرقيقة بينما أنا في أشد لحظات الضجر والضيق .... بلطفٍ وبراءةٍ ... فأبتسم ثم أضحك من قلبي ببراءة معها وأنسى همومي  :)

لكن....لن تجبرني خاطرتي وأمنيتي بأن أراها أمام عيني على التنازل للوصول إليها (;

الحياه فرصه ومبتتكررش ياتاخد خطوه ليها وتاخدها .....
 يامتلوش غير نفسك على ضايعها لان القدر مش هيكررها

لا تقتولوا احلامهم....

السلام عليكم
كيف حال الجميع .......... بقالى كتير مكتبتش حاجه مش عارفه ليه
يمكن من كتر ما نفسي مسدودة ومش حاسه انى قادره اكتب حاجه فيها اى امل
ويمكن لانى حسيت ان الاحداث كانت اعظم من انى اعد اكتب عليها من البيت وانا سليمه
ويمكن لانى كنت حزينه عشان خيره شباب هذا البلد راحو وانا لسه قاعده .... ومش عارفه هنعد فى البلد مع مين بعديهم ولا ليه اصلا نعيش بعد ما هما راحو واحنا لسه مجبناش حقهم ولا حققنا حلمهم


بس امبارح حصل الى خلى عندي دافع كبير للكتابه تانى
امبارح قابلت اول شاب فى مصر اشوف الامل صحي جواه وهو كان اخر واحد فى العلم اتخيل انى اسمع منه كده


بينما نحن نتحاور فى أمور شتى .... وجدت زميل لي يسألنى .... هل تريدون متطوعا جديدا معكم فى الجمعيه ــ حيث أنى متطوعه فى احدى الجمعيات الخيريه ــ ثم وجته يوجه كلامه للجميع .. انا قررت اشارك فى الحياه .... قررت اتطوع فى احدى الجمعيات الخيريه لاساعد فى نهضه بلدى....... قررت اشارك فى الحياه السياسية واشترك فى احد الاحزاب وذكر احداهم
ثم استطرد فى الحديث كنت انوى السفر .... بل شرعت فى تجهيز اوراقي للسفر وعزمت عليه عزما جادا قبل الثورة .... فقد كنت لا اشعر اننى احيا فى وطنى .... وانه لا فائده من العيش هنا
ثم قامت الثوره وبعثت فى الامل وقررت ان ابقى والا ابقى ساكنا بل يبقى لي دورا فيها
من اليوم اشعر انها بلدي تستحق مني التعب من اجلها


كان لكلامه عظيم الاثر فى نفسي ........... لم اكن اعلم اننا فعلنا ذلك...... لم اكن اتخيل انه كان بإمكاننا ان نحي فى قلوب شباب كرهت اوطانها وماتت قلوبها ، الامل وحب الحياه ... كنت اظن اننا احيينا الامل فى قلوب الثوار من كان لهم فى قلوبهم بصيص للامل ولو ضئيل


لاول مره منذ عام اشعر بان كل ما حدث لم يذهب هباء ولم يكن بلا ثمن


ولكن ........ استحلفكم بالله جميعا الا تقتولوا احلامهم
لا اوجه حديثي لاحد ولاول مره .......... لا اقصد اى فئه من انصار نكمل الثوره اولا ....... او الاستقرار اولا او حتى المؤسسة العسكرية
لا اطالب احد بان يكف عن السعي لتحقيق حلمه بطريقته


لا اطالب الثوار بالرجوع الى منازلهم وانتظار رحيل العسكر حينما يحن وقت الرحيل وياذن الله بذلك
ولا اطالب انصار الانتظار بالنزول للشارع لاستكمال الثورة واجبار المجلس العسكري على تسسليم السلطه للمدنين
لا اطالب مجلس الشعب بتغير موافقه او الاستماع لصوت اخر غير اصوات النواب
لا اطالب اى من الاحزاب او التكتلات السياسيه بان ياخذوا موقف ما او ان يغيروا مواقفهم
ولا اطالب حتى انصار مبارك بان يتخلوا عن مبداهم فى مناصرته ربما لهم فى ذلك حكمه لا نراها


ولكن اطالب الجميع بشئ واحد .......... ارجوكوا اعلموا انه لاول مره منذ اعوام كثيره ربما لا نعرف عددها ولا نعرف كيف نُحصيها .... هناك فى ارجاء الوطن شباب يري امل فى غد مشرق ....... لا يجد غضاضه فى ان يدفع حياته ثمنا لوطنه ليعيش سعيدا ....... يتنازل عن بعض احلامه بالثراء  ليحيا فى وطنا ثري به
ربما هناك فى مصر الان من قرر ولاول مره ان يبذل جهدا ليرتقي بها ... حتى وان كان بلا مقابل بعد ان كان ياخذ منها ولا يعطيها شئ لانه يشعر داخلها بالغربه


بالله عليكم الا تغلبوا مصالحكم هذه المره .......... بالله عليكم ان تفكروا كم تقتلون فى كل يوم يمر وانتو تغلبون مصالحا خاصه على مصلحه الوطن
بالله عليكم ان تتركوا لنفسكم الفرصه ان تفكروا وتفكروا وتفكروا  مليا فى كل خطوه قبل ان تخطوها فلربما احيت احدها امل واماتت احداها مئات
بالله عليكم ان تغلبوا هذه المره ضمائركم قبل قلوبم وعقولكم فى خطواتكم التى قررتم ان تخطوها
ارجوا من الجميع ان يفكر ويعرف ويتأكد أنه يحمل هم وطن على عاتقييه وامل جيل جديد من الشباب لم  تعرف مصر مثله من قبل فلا ياخذ قرار ولا يخطوا خطوه الا ونيته الاصلاح الا وقد فكر مليا ورأى انها اصلح الخيارات المتاحه


واخيرا الى كل من بيده شئ ويملك فى هذا البلد امرا الا يعمل فيها الا ما يعلوا بها ويرتقي بها ويحقق املنا فيها
وتذكروا لا تقتلوا احلامهم واحلامنا

نفسي اعيش

امبارح ... قابلت بنوته جميله اوى
رقيقه خالص وشكلها اصغر من سنها الى عرفته بعد شويه .... قبلتها بالصدفة البحته فى المواصلات وانا مروحه بعد يوم طويل جدا جدا جدا بالنسبالى


قعدت جنبي ومتكلمناش خالص... بعد شويه صحبتى كلمتنى تطمن عليا وطبعا بما اننا يوم الحد وفاضل 3 ايام على 25 يناير منستش اسألها هنتقابل امتى بالظبط

بقولها هتنزلى يوم 25 امتى ... ولما سألتنى نازله قلتلها طبعا ... واتفقنا ممكن نتقابل امتى و....
خلصت المكالمه وسلمت على صحبتى

البنوته بدون اى سابق انذار :

انتى نازله يوم الاربع؟؟؟ رايحه التحرير؟؟

انا : اه ان شاء الله طبعا 

البنوته " الى بالمناسبه مش فاكره اسمها مع انى فاكره شكلها الجميل كويس" : 

انتى مش خايفه ؟؟

.... انا خايفه اوى من يوم 25 ...... انا خايفه عليكي بلاش تنزلى .... انتى مش خايفه؟؟

انا : لا مش خايفه .... الميدان مبيخوفش

البنوته : انا من مصابي 25 

انا : بجد؟؟ الف سلامه عليكي 

البنوته : انتى مش خايفه يجرالك حاجه

انا : لا مش خايفه ولو موتى هيغير البلد انا مستعده اموت بس المهم ماموتش ببلاش وفى الاخر البلد متتغيرش

البنوته : انا مش موافقه على النزول يوم 25 وخايفه من الى هيحصل وحاسه ان نزولنا ملوش لازمه

انا : على فكره انا مهندسه... وكملت شويه كلام عن النزول

البنوته : انتى ليه قولتيلى انك مهندسه ... على فكره انا كمان مهندسة

انا : عشان بس كل الناس بتكلم عننا على اننا بلطجيه ومخربين .. اومغيبين فكريا ... او ماشين ورا مش عارفه مين الى بيحركنا

البنوته : لا والله .... انا عارفه انكو كويسين بس انا خايفه عليكو

انا : انتى عارفه احنا نازلين ليه ؟؟

البنوته : لا

انا : احنا نازلين لمطلب واحد بس تسليم السلطه لمجلس الشعب المنتخب الى" انتخبناه " عشان يعمل انتخابات رئاسيه عشان كفايه كل الى حصل ده

البنوته : طب ما هو هيسلمها بعد 6 شهور .... انا مش مستحمله ناس تموت تانى او يجرالها حاجه كفايه كده بقى انا خايفه عليكو وخايفه عليكي اوى ... استنو شويه ونسيب الدنيا تهدى

انا : على فكره انا اول واحده فى مصر محتاجه استقرار واول واحده تتمنى البلد تستقر النهارده مش بكره
لان الثوره قعدتنى فى البيت وقفلت المكتب الى كنت شغاله فيه ونتيجه ده انا وقفت الماستر بتاعى يعنى كل احلامى وقفت فأجه لحد ما البلد تستقر فلو حد عاوز استقرار يبقى انا ... بس عمرنا ما هنستقر كده غير لما الثوره تخلص....

انا : انتى عارفه دى للمره الكام يطلوبوا مهله 6 شهور لتسليم السلطه.... دى تالت مره يطلبوها مره يوم 13 فبراير بعد تنحي مبارك وقالو ست شهور ولما خلصوا الست شهور قالو معلش البلد مكنتش مستقره كمان ست شهور وهنسلم  البلد ولما الست شهور التانين قربوا يخلصوا بداو انتخابات البرلمان وقالو لسه كمان ست شهور ولو سكتنا عمر نهايه الست شهور ما هتجي
البنوته بصتلى وابتسمت وسكتت شويه كتير .... وبعدين قالتلى عندك حق
واتكلمت معاها شويه فى سياسه المجلس وان البلد متغيرتس فى "تأييد تام من البنت" ...

وبعد شوية

البنوته : انا اتصبت يوم 25 ...ومن ساعتها وانا بخاف من كل حاجه ...... الامن المركزي ضربنى وقعدت فى المستشفى كتير وعظمه مناخيرى اتكسرت بس الحمد لله خفيت .... من ساعتها وانا خايفه اوى وخايفه عليكو اوى

انا اصلا مليش فى السياسه ومليش دعوه بحاجه .... انا كان عندي شغل يوم 25 الى فات ونزلت عشان شغلى بس حسيت انى عاوزه اروح اشوف الناس بتعمل ايه نفسي انزل ابص واشوف ايه الى بيحصل..... انا مع الثوره بس كنت خايفه ومش حاسه ان في حاجه هتحصل

نزلت الشارع اشوف الامن هجم علينا وانا اتمسكت واتضربت لحد ما اتبهدلت واتصبت

انا: على فكره انا مش شجاعه اوى يعنى زي منتى فاهمه ..... انا خايفه موت ونفسي اعيش 

نفسي اخلص الماجيستير بتاعى ... 
عندى احلام كتير اوى فى حياتى نفسها اعيشها

نفسي الثوره تخلص والبلد تستقر وارجع شغلى

نفسي اشتغل فى مجالات كتير واعمل حاجات كتير اوى

نفسي البلد تبقى مستقره وتتطور واحس انى فى بلد بتحترم الناس 

انا مش عايزه اموت ونفسي ممتش دلوقتى ...... خايفه اوى على اهلى لو جرالى حاجه ... انا بنتهم الكبيره 

ونفسي افرحهم بيا وبنجاحى ف حياتى 

بس كل ده مش هيحصل غير لو البلد اتغيرت واستقرت والثوره تخلص 

لو متنا هو التمن فى ان البلد تتغير انا معنديش مانع اموت بس حاجه تحصل بدل الى احنا فيه

البنوته : يا حبيبتى انا خايفه عليكي خلى بالك من نفسك  

         انتى قايله لأهلك انك نازله؟

انا: لا مش قايليلهم هما عارفين انى عندى كورس يويميها ..... اهلى خايفين عليا ومش موافقين انى انزل التحرير ولا وفقوا قبل كده بس انا بنزل .....بشوف اى حجه وانزل ....... ومعرفه اصحابي عشان لو جرالى حاجه لا قدر الله يقولولهم 

بعد كده اتكلمنا فى حاجات كتير عن البلد ومجال شغلنا لانه بالمصادفه هيا فى نفس مجالى ..... وعنها وعن اصابتها ولما جت نازله سلمت عليا وقلتلى ربنا معاكى خدى باك من نفسك وحافظي عليها .. 

حقيقى لما روحت البيت وافتكرت الى حصل استغربت انى قلت الكلام ده ومعرفش انا جبته منين.......
حقيقي انا فى الميدان مش ببقى خايفه بحس بأمان يمكن عشان حواليا ناس نقيه خرجت كل حاجه وحشه فى قلبها بره قبل ما تدخل لانهم مش ضامنين يخرجوا منه تانى
ويمكن عشان بحس انى وسط ناس خايفه عليا اوى رغم ان دى اول مره تشوفنى فيها وميعرفونيش
ويمكن عشان ربنا بيقوينى وبيثبتنا واحنا هناك
معرفش ليه ببقى مش خايفه 

بس مش زي ما انتو فاهمين ...... بخاف لما العسكر يهجموا وبجرى
انا جبانه وبقف جوه الميدان بعيد عن الضرب لانى خايفه اموت وخايفه اكتر لأتصاب


كل مره بنزل فيها بحلم انى ارجع تانى البيت وانام على سريرى واتخانق مع اخواتى واعمل كل الحاجات الى بعملها حلوه ووحشه وببقى مشتاقه للبيت

كل مره قبل ما انزل اخاف اوى لاحسن اتصاب .... الموت عندى اهون


كل ما اتخيل لو كنت مكان حراره كان ممكن يجرالى ايه اكيد كنت هموت ومش هستحمل لانى مش قويه


كل مره بنزل فيها بدعى انى اروح سلميه عشان اعيش احلامى 


مره زمان اتسألت نفسك تموتى وانتى عندك كام سنه قلت وانا عندى 50 او 60 كفايه اوى
النهارده وانا بكتب النوت دى حاسه انهم قليلين جدا ونفسي اعيش سنين كتير اد احلامي لنفسي ومستقبلي 


ورغم خوفى الكبير الى زاد ..... ورغم انى حاسه انى هموت ....... ورغم الصدف الغريبه الى بتحصل ادامى اليومين دول بتخوفنى اكتر وتحسسنى انى قربت اموت
منهم ان وحده من اصحابي بدون مناسبة بعتتلى رساله توصينى فيها بتجديد نيه الشهاده قبل منزل يوم الاربع مع انها مش عارفه انا نازله ولا لا
وواحده تانى بعتت بردو حاجه بنفس المعنى تقريبا ..... وناس كتير بتكلم على الى ممكن يحصل يوميها ( مع انى حاسه انه مش هيحصل حاجه يوميها او على الاقل الصبح )


بس بردو هنزل ان شاء الله وعندى امل انى ارجع تانى واعيش واحقق احلامى
هنزل وعندى امل فى بكره احلى من النهارده ومن امبارح
هنزل وعندى امل ان مصر تتغير واعيش فيها الى حلمت بيه


هنزل وكلى امال واحلام كتير وكبيره اكيد زي كل احلام الى نزلو من سنه وملحقوش يحققوها عشان دفعولنا حياتهم .... واكيد زي احلام الناس الكتير الى مش هتنزل 


انزلوا معانا عشان احساسنا بالامان يزيد وانتو جمبنا ... وعشان قوتنا فينا احنا وسلالحنا فى وحدتنا


انا مكتبتش النوت دى والله عشان اقول لحد ينزل بس كنت حاسه بيها اوى ونفسي الناس تحس بيا وتفهم احنا نازلين ليه


انا نازله وعندى امل ارجع تانى ونحتفل سوا كلنا السنه الجايه بالذكرى الاولى لنجاح الثوره وببلد جديده اسمها مصر مختلفه عن مصر بتاعت زمان :)
يارب حققلى حلمى


افتكرت اسم البنت ......... زينب

أنزل

معرفش ليه حاسه كده بحاجات غريبه جدا


احاسيس ملغبطه اوى 
خوف وفرحه واشتياق...
خايفه ومستنيه بشوق وفرحانه بس قلبي مكسور
خايفه اوى من 25 بس مستنياه اوى وحساه اتاخر اوى ونفسي يجي بقى
وحشنى اوى الميدان وهو مليان والناس بتهتف يسقط يسقط حكم العسكر
ولما يجي اسم مصر الارض تتهز تحت رجلينا واحنا بنحتف تحيا مصر
وفرحانه اوى انه قرب وفاضل 5 ايام عليه
بس خايفه ومش مطمنه مش مستحمله ناس تانى تصاب وتموت وعنيها تروح .......... مش حاسه بدعم الناس زي زمان ........ خايفه اموت واهلى قلبهم يتكسر عشانى وفى الاخر اتخون واطلع كنت مخربه ومضحوك عليا


قلبي مكسور مش عارفه ليه............ يمكن عشان لسه كل ما اشوف صوره شهيد او اسمع اغنيه يابلادى يابلادى .... انا بحبك يابلادى اعيط اوى وقلبي يوجعنى.....


يمكن حاسه بكده عشان بقالنا سنه ولسه دموع اهالى الشهدا فى عيونهم منشفتش؟؟؟


يمكن عشان لما بروح ازور المصابين او اهاليهم قلبي يتقطع وهما فى المستشفي محدش حاسس بيهم


يمكن عشان لقيت اخت مصاب بقاله 3 شهور فى غيبوبه فى العنايه المركزه مش بيعرفوا يشفوه ... مامته نفسها بس تسمع صوته مره ......... وحالته حرجه ومحتاج عمليه ومحدش ولا بيعبروه ولا بيعبر اهله فى المستشفي ... وسيبينه كده
ولما كلمت اخته كانت بتضحك وتبتسم كانها بقالها 3 شهور مش عارفه تستوعب اخوها جراله ايه؟؟؟


وانا بكلمها حسيت انها بتكرهنى وبتكرهنا كلنا عشان مش بنساعدهم هم واخوها؟؟
ومع ذلك هيا مبتسمه علطول ........... ولما بنسالها طب هو عامل ايه دلوقتى ...بتضحك وتقولنا تعبان ومحتاج عمليه


يمكن عشان بقالنا سنه كامله ولسه بنتشتم نفس الشتايم ولسه ناس بتقولنا كفايه خربتوا البلد؟؟


يمكن عشان كلمت ابو مصاب وحسيت انه من كتر ما انكسر وقلبه اتجرح على ابنه الى مرمي ادامه بيتألم ليل نهار بقى بيخاف من كل حاجه وكل حد وقعد يتحايل عليا منزلش تانى الميدان؟؟


يمكن عشان صحبتى مصابه وبابها بيضغط عليها وزعلان منها عشان نزلت الميدان ومحلفها ما تقول لحد انها اتصابت فى التحرير لانه خايف لحسن يعملوا فيها حاجه.......... ورغم كده هيا عاوزه تنزل تانى يوم 25
ولسه بيتقال علينا بلطجيه وعاوزين نخربها


يمكن عشان ناس بتطلع تقولنا العكسر هيمشوا بس عاوزين خروج امن؟؟؟


بعد كل الناس الحلوه الكتيييييييييير دول الى ماتت خروج امن .......... بعد كل لحظه خوف فى الميدان كنت فيها بفكر ماما هتعمل ايه لما تعرف انى مت فى الميدان وانى كنت بكدب عليها واخبي عليها انى نازله ........خروج امن ؟؟؟


بعد كل لحظه شفت فيها ادامى مصاب بيقع وبيتنقل المستشفي بس من كتر ما شفتهم ادامى بقيت حاسه انه عادى يعنى .......... خروج امن ؟؟؟


بعد ما حراره ومالك وعبد الفتاح عنيهم راحت ............ خروج امن ؟؟؟


بعد كل لحظه سمعت فيها ناس بتشتمنا بودانى وخفت ارد عليهم ليعرفوا انى من  بتوع التحرير ويضربونى او يموتونى .... خروج امن؟؟؟


بعد ست البنات ما اتعرت فى الشارع وبعدين طلع رجال دين يقولوا عليها تستاهل ايه الى وداها وهيا اصلا مش منقبه ........... خروج امن؟؟


على فكره انا مش واحده جامده وكنت فى الميدان ليل نهار ........ ولا حضرت يوم معركه الجمل ولا اضربت ولا اتصابت ...... بس حقيقي حقيقي كنت اتمنى ابقى نص اى حد من الابطال الرجاله ( ولاد وبنات ) الى كانو فى الميدان على طول




انا زعلانه منكو عشان بتقولوا العسكر يخرجوا خروج امن
زعلانه من الاخوان عشان مش عاوزين يستلموا السلطه ويعملوا انتخابات وباعونا للعسكر

زعلانه من القاضي الى بيحاكم مبارك عشان بيضحك علينا

وزعلانه اوى من الناس الى بتقولنا كفايه بقى ومش عاوزنا ننزل يوم 25

 وزعلانه اوى من بابا وماما عشان مش عاوزني انزل يوم 25 عشان خايفين عليا


هنزل يوم 25 واصحابي هينزلوا وكل الشباب الحلوين هينزلوا يوم 25 ........... هنشيل العسكر وهنحاكم المشير وهنبنى بلدنا ونخليها احلى بلد فى الدنيا وهنحتفل فى الميدان بمصر حررررررررررره والعكسر بررررررره
هنزل وههتف عيش حريه عداله اجتماعيه
هنزل عشان اجيب حق الشهيد ... والمصاب
هنزل عشان ميبقاش فى بلدنا شاحتين فى الشارع ولا اطفال بتنام تحت الكوبرى فى عز البرد
هنزل عشان منبقاش زى الخرفان والكبار بيسرقونا وياكلو خيرالبلد ويأكلونا اكل مسرطن
هنزل عشان يبقى فيه عدل والى يغلط يتحاكم
هنزل عشان صوتى يوصل ومطالبي تتحققهنزل عشان يبقى فيه شغل كتير وميبقاش فيه شباب على القهوه
هنزل عشان يبقى فيه شقق ومستوي معيشه يسمح للشباب بالزواج فميبقاش في تحرش فى الشوارع
هنزل عشان يبقى عندنا جامعات وتعليم .... عشان يبقى عندنا مخترعين ونصدر للبلاد التانيه
هنزل عشان يبقى فيه اكل وكل الناس تاكل وتعيش مبسوطه ومحدش ينام جعانهنزل عشان مش عاوزه حد يقول تانى همشي جوه الحيط او جنب الحيط وخلينا فى حالنا
انا هنزل اجيب حقي وحق مصر.............وانت قرارك ايه؟؟

من غير عنوان

اول مره اكتب وانا فى الحاله دى........... اول مره اكتب وانا حاسه بالاحساس ده


طول الوقت كنت دايما بتكلم عن المصابين والشهدا وقلبي يتقطع وممكن اعيط ويصعبوا عليا ... بس عمرى ما تخيلت ايه احساس اهلهم واصحابهم؟؟
عمرى مهما وصلت بأفكارى معرفت احساسهم غير دلوقتى


ربنا ميوريه لحد ..... عمرى ما عرفت احساسهم مهما قولت انى قلبى موجوع عليهم وانى حاسه بيهم قبل كده ... ومهما اى حد فيكو قال انه حاسس بيهم وانه حاسس انه موجوع عشانهم بردو هو مش فاهم ولا متاكد ولا حاسس بيهم اصلا ولا حاسس زيهم


اصل انا دلوقتى حسيت بيهم


طبعا محدش فتهم حاجه


النهارده عرفت ان واحده من اجدع واطيب وابسط الناس الى عرفتها مصابه من ايام محمد محمود ......... واصابتها خطيره وفالعين كمان


النهارده بس عرفت ايه احساسك لما يبقى حد من اطيب البنى ادمين الى على وجهه الارض حد طيب وبرئ وقلبه ابيض بجد ولما بيحب حد بيحبه بس من قلبه بدون اى اسباب
ويتصاب وممكن _لا قدر الله _عينه تروح بس عشان بتحب مصر اوى وكان نفسها البلد تبقى احسن


بس عشان صعب عليها تشوف اخواتها المصرين بيضربوا وببيتهانوا وعنيهم وقولوبهم بتروح كل يوم


عارفه انه كلام ممكن يكون رخم والناس عارفه ومش عاوزين يقروه بس انا قلبي واجعنى اوى ومش مصدقة


طبعا انتو مش فاهمين حاجه ...... بشويش هفهمكم


صحبتى دى بنوته عسوله وبريئة طييييييييييييييبه جدا بجد مهما قلت مش هتعرفوا هيا اد ايه حد قلبه ابيض غير لو شوفتها بتحب الناس كده عشان هيا طيبه مش عشان هما كويسين او بيعملوها حلو او وحش


ساره بنت عادية اوى ملهاش فى السياسه ولا عمرها اتكلمت عن مبارك او الشرطه ولا حتى كنت فاكرها متابعه الى بيحصل فى البلد من كتر ما هيا طيبه وفى حالها بتحب مصر اه بس هيا زى ما مصرين كتير بيححبوا مصر بدون ما يدخلو نفسهم فى مشاكل


اول مره اعرف ان ساره ليها فى السياسيه ..... اول مره اعرف ان ساره بتحب مصر اوى اوى كده واكتر منى كمان عشان انا عامله فيها شجاعه وبفهم فى السياسه وبنزل وانا عارفه الوضوع عامل ازاى انما هيا نزلت عشان صعب عليها المصرين وحسيت انها لازم تنزل تقول لمصر انها بتحبها ............. كان يوم من ايام محمد محمود بجد كانت اكبر مفاجاه ليا انى اشوف ساره البنوته الطيبه فى الميدان نازله عشان خايفه على مصر وعلينا


فرحت اوى اوى لما شفتها .......... بس كل ما افتكر انى قلتلها اول ما شفتها ساره انتى اخر حد توقعت اشوفه هنا ازعل من نفسي اوى لان هيا اتصابت وانا لا ............ ساره انتى اجدع بنت فى مصر انا بحبك اوى


ساره اتصابت اصابه غريبه عشان نعرف اننا كنا بنتعامل مع يهود مش مصرين ........... اصابه ساره كانت فى عينها وكانت من الغاز المثير للأعصاب الى اتحدف علينا .............. ساره مرحتش ولا مره محمد محمود لانها خافت يجرلها حاجه وباباها وماماتها يعرفوا انها كانت بتنزل التحرير ..... ساره قعدت طول الوقت جوه الميدان عند الصنيه دى اكتر حاجه تقدمتها




ايه اصابتها بقى بالظبط .......... الغاز المثير للأعصاب دخل عنيها وتفاعل جوه العين وعمل اجسام صلبه......... لا دى مش حكايه من حكايات نبيل فاروق فى سلسله ملف المستقبل دا حقيقه


وللأسف الحاله اتخرت لانها خافت تعترف انها كانت فى الميدان ولما عنيها تعبت اوى وورمت راحت لداكتره وادوها ادويه والادويه زودت الحاله سوء لحد ما اعترفت لدكتوره صاحبه ماميتها وعامله ليها فحصوات واشعه كتير لحد ما وصلوا الى ان الغاز كون الاجسام الصلبه دى وحاليا هيا عملت عمليه وابتدت تشوف تشاش بعينها ولسه هتعمل عمليات تانى ....


على فكره ساره مش قايله لحد عن الحاله بتاعتها وعشان كده لسه عارفه ولسه كاتبه عنها النهارده


غير ان اهلها وبالذات باباها حذروها ان حد يعرف لانهم كانو اصلا مش موافقين على نزولها وهيا نزلت من وراهم وهيا طلبت من الاتنين الى عرفوا الحاله ان محدش فيهم يقول اى حاجه لاى حد بس انا كان لازم اكتب


عشان كل الى بيشتمونا ويخنونا يعرفوا ان فيه ناس زي الورد عنيهم راحت واتصابوا ..... وانتو قاعدين فى البيت تشتموا عليهم


عشان ابناء مبارك وابناء المشير يعرفوا ان الى اتعمل فى المصرين دا ولا جرايم الحرب


عشان تعرفوا ان الناس الى نزلت الميدان مش بس لا تسعي للشهره كمان دول بيعانو فى صمت من غير ما حد يحس بيهم ولا يعرفهم


بيدفعوا ليكو تمن الحريه ويمضوا فاعل خير من غير ما حد فيكو يعرفهم ومش مستنين منكم شكر ......... ورغم كل ده كمان بتشتموهم


قلبي وجعنى اوى بجد .............. واول مره احس انى بكره ابناء مبارك ومؤيدي المجلس كده بكرهكو كلكو ويارب ساره تخف وانتو يجارلكو كده عشاان تحسوا بيا وبساره


ادعو معايا ساره تبقى كويسه عشان هيا طيبه ومتستاهلش حاجه وحشه


بس خلاص خلصت